SHILLONG: Mawmluh Cherra Cement Limited (MCCL)-ko sorkarini chipatna manchienggipani bidingo Sohra-ni MLA Gavin Miguel Mylliem-ko so·ote galna ka·mikkenataniko on·angahani gimin iandake ka·mikkenatanirangko on·jachina Hynniewtrep National Liberation Council (HNLC) bobil dolko, United Democratic Party (UDP)-ni MLA aro a·dokni Cabinet Minister Paul Lyngdoh didiataha.
Lyngdoh-ni parakatani gitade, maini a·sel MCCL-ko chipna nangengachim, pilak manderangan ma·sitokengani gimin Sohra-ni MLA-ko dos gale so·ote galna ka·mikkenataniara kraani ong·jachim.
Iani bidingo kobor ra·timgipa manderang baksa agangrikengon, MCCL-ko sorkarini chipna tik ka·aniara Sohra MLA-ni a·sel ong·ja indiba dingtang dingtang a·selrangchisa MCCL-ko tangatpilna man·jaengani gimin sorkari ia company-ko chipna tik ka·aha ine UDP MLA parakataha.
MCCL-ko chipna gita sorkarini tik ka·ahani gimin HNLC bobil dol, a·dok sorkarina mikrakataniko on·angenba, iani bidingo Sohra-ni NPP MLA-ko dosi chane, uko so·ote galna ka·mikkenataniko on·ahachim ine nikna man·a.
MCCL-ko sorkarini chipatna tik ka·enganina an·tangko dosi channe HNLC bobil dolni so·ote galna ka·mikkenataniko on·ahani gimin Sohra-ni NPP MLA Gavin Miguel Mylliem, aiao inmananiko parakatskaahachim.
HNLC bobil dolni uko so·ote galna ka·mikkenataniara badiaba political dolni ‘politics’ kal·na jotton ka·aniko mesokani gitasa ong·enga ineba ua aganahachim.
