GH-o Congress-ko bilakbatatna NE I/c Tura-ona re·baa
TURA: Bharatiya Janata Party (BJP)-chi dilenggipa NDA sorkarini ning·o a·songo songdongenggipa manderangsan ong·aigija a·songko dilenggiparangba jakgitelaniko man·jaengaha ine Sombar salo, All India Congress Committee (AICC)-ni North East In-charge Dr Chellakumar, Garo Hills-o Congress dolko bilakbatatna gita Tura-ona re·bae Congress dolni membor-rang baksa tom·anio aganaha.
Adita salrangna skang Parliament-o sorkarini kosako matnange agananina Opposition dolni sak 122 MP-rangko dontongatahani gimin Dr Chellakumar, ia kattarangko aganaha.
“Parliament-o chinga an·tangtangni chanchianirangkon aganna man·jaenga ong·ode da·o ong·enggipa sorkarini ning·o jakgitelaniara bao? Modi sorkarini ning·o da·o chinga an·tangtangni ska gita ganna china, aganna aro cha·na ringnaba man·jaha,” ine Dr Chellakumar aganaha.
BJP-chi dilenggipa sorkari maming gital kamrangko ka·a dongja indiba Congress sorkarini somoio ra·gatgipa scheme-rangkosan bimang dingtangataiaha ineba AICC-ni NE I/c aganaha.
Congress dolko namdapatna gita bi·atenggipa tangka paisarangni bidingo sing·anina aganchakaniko on·angengon, election-ni somoirango tangka paisarangko jakkalana batede onbatgipa gadango manderang baksa nangrimanisa mongsongbatgipa ong·a ine Dr Chellakumar aganaha.
“Tangka paisarang an·chingna gamchatengnaba gnang indiba election-ni somoirango manderangsa na·simang baksa bakrimgipa ong·ani gimin manderang baksa bakrimanian mongsongbatgipa ong·a. Uni gimin na·simang sakantikon anga, manderang baksa bakrime Congress dolko mangrakbatatna gita kam ka·china didienga,” ine Dr Chellakumar, Garo Hills-ni Congress worker-rangna aganaha.
Ia tom·anio, Meghalaya Pradesh Congress Committee (MPCC)-ni president Vincent H Pala, working president Deborah C Marak, Gambegre-ni Congress MLA Saleng A Sangma, gitcham MLA Billykid A Sangma, gitcham MLA Brigady Marak aro dingtang dingtang dilgiparangba bakko ra·angaha.
