TURA: Meghalaya a·dokni ning·o donggipa dingtang dingtang biaprango post office-ni dingtang dingtang kamrangna manderangko ra·anio advertisement-o on·gimin niamrangko pe·aha ine Phulbari jolni Rural Development & Anti Corruption Organisation (RDACO) matnangataha.
Iani bidingo Shillong-o donggipa NE Circle-ni Chief Post Master General-na badi ka·e sedoatgipa chittio RDACO-ni parakatani gitade, Meghalaya a·dokni dingtang dingtang biaprango donggipa post office-rango, Gramin Dak Sevak (GDS), Branch Post Master (BPM), Assistant Branch Post Master, Dal Sevak aro uandakgipa kamrangna ia 2023 bilsini May jao advertisement ba u·iataniko on·ahachim aro ia advertisement-o janapatani gitade, Assistant Branch Post Master aro Dak Sevak gita dakgipa kamrangnade post office-ni a·ja ning·o ga·akgipa biaponi ong·na nanga aro uanbaksana Secondary level-ona kingkingde Garo, Khasi aro Jaintia-ko compulsory ba elective subject dake poraigipa ong·na nanga ine janapani dongachim.
“Indake ong·genchimoba, kosako janapgimin kamrangna ra·ako man·gipa mitam candidate-rangde post office a·ja ning·o ga·akgipa manderang ong·ja aro Garo, Khasi ba Jaintia subject-ko poraigipa candidate-rang ong·jani gimin ian niamko pe·ani gita ong·aha,” ine RDACO-ni president Zamiul Mondal parakatenba, iani bidingo ta·raken nipiltaianiko dakchina NE Circle-ni Post Master General-ko didiataha.
Ia chittini copy-ko RDACO, Meghalaya a·dokni Chief Minister Conrad K Sangma-naba on·ataha.
