Sombar sal dipet VPP bilakbate jingjengatgen
SHILLONG: Lokayukta-ni official-rangko kam ra·galani bidingo a·dok sorkariko matnangengani gimin iandake matnanganirangko dakna skang, Lokayukta Act-ko poraichengchina gita Voice of the People’s Party (VPP)-ni dilgiparangko aganani ja·man, Lokayukta Act-ni bidingo jera ra·grikna gita a·dokni Deputy Chief Minister aro National People’s Party (NPP)-ni state president Prestone Tynsong-ko VPP ra·biatskaaha.
Tangka paisa jakkalsretaniko warachakna gita bilakbate ja·kurangko de·anggen ineba VPP parakataha.
“NPP-chi dilenggipa MDA sorkari, kakketko dongnuna jotton ka·engani gimin chinga Tynsong baksa ba uamangni je dilgipa baksaba Lokayukta Act-ni bidingo jera ra·grikna kusi ong·aigen,” ine VPP-ni president aro Nongkrem-ni MLA Ardent Miller Basaiawmoit parakataha.
Kamoni neng·takgimin officer-rangni pal kamo ong·kuenggipa officer-rangko kamo ra·ani namgnini gimin janapatengon, kamoni neng·takgimin officer-rangde sorkarini agananirangko knachakjawa ine ma·siengani giminsa uamang (sorkari), kamo ong·kuenggipa officer-rangko kamo rakkina nangnikenga ine Basaiawmoit, Deputy Chief Minister-na aganchakaniko on·ataha.
“Tynsong-ni bi·sa dake agangipa kattarangna chinga iako aganchakna kusi ong·a, chong·motan officer-rang uni (Tynsong) bakdrang nanggiparang ong·genchimoba chinga uamangni bilna warachakkuaigen maina chinga darangkoba watchanggalna sikja,” ine Basaiawmoit aganaha.
Kamoniko ra·gala man·gipa officer-rangara, VPP membor-rangni bakdrang ong·ani giminsa iani bidingo jegaltokenga ine Tynsong-ni agangipa kattarangna VPP-ni president, ia kattarangko aganchakaha.
“Manderang ching baksa bakrimenga ine sorkari gualna nangja aro tangka paisa jakkalsretaniko warachakanio anga pilak manderangkon ching baksa bakrimchina didienga,” ine Basaiawmoit aganaha.
Sombar sal dipet VPP, bilakbate jingjengatanggnok ineba Basaiawmoit parakataha.
Lokayukta-ni officer-rangko ra·galani bidingo agangrikna gita VPP-ko okamjawa aro officer-rangkoba kamo ra·piljawa ine Sukrobar salosan, a·dokni Deputy Chief Minister parakatahachim.
Meghalaya Lokayukta-ni official-rangko ra·galani bidingo mamingkoba matnangna ba badi ka·na skang, Lokayukta Act-ko name poraie nichengchina gita adita salrangna skangsan, Tynsong VPP dolko didiatahachim.
“Iani bidingo chinga party-ni gitaba talataniko on·manaha. Uamang Lokayukta-ni niamrangko poraichengesa badi ka·na nanganirangko ka·china,” ine ua aganahachim.
“Lokayukta-ni niamon official-rang kam ka·kuenggipa officer-rangsa ong·na nanga ine janapani gnang. Uni gimin niamko ma·sichenggija skatang matnanganiara kraani ong·ja,” ine Deputy CM parakataha.