TURA: Nokma Council-ni chang 19-gipa annual conference ba bilsini tom·bimonganiko Sonibar salo, South Garo Hills a·jani Nengkong a·kingo ong·atangaha aro ia tom·bimonganio a·dokni Education Minister aro Siju-Rongara constituency-ni MLA Rakkam A Sangma, mongsonggipa sokgipa ong·e bak ra·angaha.
Ia tom·bimonganio, a·dokni Education Minister aro Siju-Rongara MLA, jinmana aganprakangengon, ian A·chik Raja aro Ranirangni tom·bimongani ine agangenchimoba maming gualani dongjawa aro ian ong·chongmota ine Nokma Council-ni gimin aganangaha.
Nokmarangde a·kingni nokgipasa ong·e raja-ranirang gita an·tangtangni position-o aro an·tangtangna on·gimin bilrango pangchake dongna nangan baksana kamrangko ka·na nanga ineba Sangma aganaha.
Jatko dilenggiparangna sorkari ia sal somoirango dingtang dingtang dakchakanirangko on·enga ine janapatengon, sorkarini on·enggipa cholrangko ra·e Nokmarangba a·kingtangtangko aro a·songko namdapatna gita cholrangko man·gen ine a·dokni Cabinet Minister parakataha.
A·chikrang jolni kri dingtang dingtang ku·sikrang, jekai Am·beng, Matabeng, Ruga, Atong, Matchi, Garaganching aro uandakgipa ku·sikrangko agana ine janapatengon, joltangtango jakkalgipa ku·sikrang gimajana gita pangnan ia ku·sikrangko agananichi ripinge rakkina nanga ine Sangma ku·pattianiko on·angaha.
Nokma Council-ni kamrango pilak nanga dakchakanirangkoba on·na gita Education Minister, ku·rachakaniko on·angaha.
