Gital Secretariat-ko October jaoni rikchakatnaba gnang: Conrad
SHILLONG: Shillong songjinmani ramarango apchangket ong·aniko komiatna gita New Shillong Township (NST)-ona dakanggipa rama dilgittamko tarina Budbar salo, a·dokni Chief Minister Conrad K Sangma, a·dokni Deputy Chief Minister aro PWD (Roads) Minister Prestone Tynsong baksa pangchakaniko songe on·angaha.
Ia dilgittam ramarangara, gong kror 49-na hisapsoenggipa Bellafonte-NST rama, gong kror 55-na hisapenggipa Diengpasoh Road-Shillong Bypass aro gong kror 27-49-na hisapenggipa Bribah Mawpat-NST ramarang ong·a.
Ia ramarang baksana Shillong Diengpasoh ramani km 14-oni km 21.20-ona ramarangko taridapna gitaba pangchakaniko songe on·angjolaha.
Koborko on·ani gitade, ia dilgittam ramako tarina gita bakan tender-ko on·gnok aro rama tariani kamrangkoba bakan a·bachengna ka·dongenga.
Ia ramarangko tarina gita pangchakaniko songna Shillong songjinmani Hotel Vivanta-o tom·aniko ong·atanio a·dokni Chief Minister, jinmana aganprakangengon, indita bilsirangna Shillong songjinmani ramarango apchangket ong·aniko namatna dingtang dingtang cholrangko sandiengoba da·onan chu·sokgipa ong·na man·kujaengachim indiba da·alo NST-ona dakanggipa rama dilgittamko tarina pangchakaniko songe on·aniara, ramarango apchangket ong·aniko namatna chol man·ani gita ong·engaha ine parakangaha.
“Batanggimin somoirango ramarango apchangket ong·aniko komiatna jotton ka·ahaoba haida ian skanggipa changna Shillong songjinmao apchangket ong·aniko namatna nikenggipa jumangko chu·sokatani chol ong·enga,” ine Sangma aganaha.
Ia gital Shillong songjinmakosan ba gital administrative city-kosan namdapatna nangenga ong·ja ine janapatengon, “An·ching da·o ong·enggipa Shillong songjinmakoba namdapate, ia gital Shillong songjinmao gital ramarangko tarina nangkuenga. Shillong songjinmao ta·rake dingtanganiko niatgenchimode skang somoirango iandakgipa kamrangko nika dongjawa aro an·ching gital project-rangkoba nikangkuna sienga,” ine Chief Minister parakataha.
NST-o rikna sienggipa gital Secretariat-ni gimin janapatengon, ia gital secretariat-na da·o noksarangko salengaha aro ia kamko uamang March jani gisepon matchotna ka·dongengani gimin ia gital secretariat-ko October jaonide rikna a·bachengnaba dongaha ine Chief Minister aganaha.
“Secretariat-ko NST-ona apjitbaanichi Shillong songjinmao ramarangni apchangket ong·aniko komiatna sorkari ka·dongsoenga,” ine Sangma aganaha.
Ia bilsini gisepo a·dok sorkari, dingtang dingtang project-rangko a·bachengatna sienga ine janapatengon, Smart City project-ni bak ong·enggipa Integrated Command & Control Centre (ICCC), Golf Link aro uandakgipa dingtang dingtang project-rangko ia bilsion a·bachengatgnok ine Chief Minister parakataha.
“Shillong songjinmao pangna nikkugijagipa dingtanganiko nikna sienga,” ine Sangma aganaha.