Nongpoh: A·songo January 26 tariko Republic Day-ko manimiting somoio Ri Bhoi District-ni National Highway 6-o rama a·sel ong·aha. Ta·rake salbagipa truck gari baksa chagake a·sel ong·anio saksani biaptangon sikamaha, aro bang·a manderang mata bu·ako man·aha.
U·iattimgipani gita, ia a·selra salni 1 bajio Umryngkai-o ong·aha, jeon ta·rake salbagipa truck gari jeni registration nombor AS01 MC8136 ong·achim, ua Shillong-oni Guwahati-chi re·angmitingo highway-ni sepango car wash donggipa biapo bolgni parking ka·e donggipa gari baksa chagakaha.
Eeco gari jeni registration nombor ML10 B8800 aro Autorickshaw jeni registration nombor ML10 C9558 ong·achim, ua garini driver-rang gariko susangengachim, unon ia a·sel ong·aha. Truck gari bilake parking ka·e donggipa garirang su·gakaha, aro unbaksana sepango donggipa chongipa dokanba man·chapaha.
Ia a·sel ong·anio Anshu Kumar (20) jean Eecho garini driver ong·achim, ua biaptangon sikamaha. Autorickshaw-ni driver-ba bang·en mata bu·ako man·aha, uko da·o Nongpoh Civil Hospital-chisana bananiko on·na rimangaha. Indiba saknaa man·anirang dal·ahani gimin ua saknaa man·gipa mandeko Shillong City-ni hospital-chi rimangskaha.
Kobor man·soani gita ia a·sel ong·ani ja·manan truck-ni driver joke kataha. Police joke kate dongenggipa truck-ni driver-ko rim·na sandirikitaniko dakenga.
