TURA: MDC scheme-ni ning·o Zikzak GDC constituency-na chamatgipa minggittam project-ni gong lak 69 tangkarangko jakkalsreta ine South West Garo Hills a·jani A·chik Holistic Awakening Movement (AHAM), GHADC-ni Chief Executive Membor (CEM) Albinush Marak-na seachi badi ka·doatenba, iani bidingo sandirokatchina didiataha.
AHAM-ni parakatani gitade, Zikzak constituency-na chamatgipa project-rangni bidingo RTI ka·e am·sandion, Mahendraganj-ni ning·o donggipa Silkona songo gong lak 25-ni kal·chakramo a·a gapatani, apsan kal·chakramon gong lak 19-ni boulder wall-ko tariani aro Silkona songo gong lak 25-ni toilet dambongako rikna chamgimin tangka paisarang dongachim ine ma·sina man·aha.
Ia project-rangko 2021-2022 bilsina Fifteenth Finance Commission (Basic Grant 2nd Instalment)-ni ning·o commission ka·ahachim ine janapatengon, ia pilak project-ni tangka paisarangkon Zikzak constituency-ni MDC Akter Ali, ia kamko man·gipa contractor baksa jakkalsretaha ine AHAM SWGH matnangataha.
“Chingni RTI ka·e man·ani gitade, ia kamrangna Zikzak MDC Akter Ali, nanga gitan tangka paisarangko man·soahachim indiba kamrangkode ka·jaha. Ian manderangni namgnina chamatgipa tangka paisarangko jakkalsretani ong·chongmota,” ine AHAM SWGH-ni co-chairman Brejio Marak parakataha.
Dingtang dingtang kamrangna tangka paisarangko chame on·anio maming nirok sandianirang dongjaenga ine GHADC-ko sing·doatengon, mikkangchi Garo Hills-ni namgnina chamatenggipa tangka paisarangko nambate nirok sandichina gita AHAM SWGH, GHADC-ni CEM-ko didiataha.
“Constituency-tangni namgnina chamatgipa tangka paisarangko jakkalsretahani gimin chinga iandakgipa MDC-rangni kosako niamo pangchake ja·ku de·china dabienga,” ineba Brejio Marak parakataha.
