Khasi-Jaintia Hills-ni block-rangna jabol chimonggipa garirangko sualata
SHILLONG: Bristibar salo, Ri Bhoi a·jani Bhoirymbong jolo donggipa Lumdaitkhla songo dingtangmancha program-ko ong·atangenba, East Jaintia Hills, Eastern West Khasi Hills, East Khasi Hills and West Jaintia Hills a·jani dingtang dingtang block-rangna a·dokni Chief Minister Conrad K Sangma-ni jakchi, Waste Collection e-Vehicles ba jabol chimongani garirangko suale on·ataha.
Official-rangni u·iatani gitade, Bristibar salo, Khasi aro Jaintia Hills a·jani dingtang dingtang block-rangna gimik bol 207 jabol chimonggipa garirangko sualataha aro Garo Hills-ni block-rangnaba ja·mano apsan dakgipa program-ko ong·atangenba ia e-Vehicle-rangko suale on·angskagen.
Ia program-ko ong·atanio, a·dokni Deputy Chief Minister Sniawbhalang Dhar, Health Minister Ampareen Lyngdoh, PHE Minister Marcuise N Marak, Umroi MLA Damanbait Lamare, Umroi-ni MDC Rangkynsai Kharbuki, PHE aro Shillong Municipal Board-ni official-rangba dongpae bak ra·angaha.
Ia program-ko ong·atanio a·dokni Chief Minister, tom·anio bak ra·giparangna aganprakatengon, India sorkarini ra·gatgipa Swachh Bharat Mission (Grameen) program-ara, a·songni pilak songrangkon Open Defecation Free (ODF) Plus ba bangbango skatang a·pal re·ani grigipa songrang ong·atna miksonge ra·gatgipa program ong·a ine talataniko on·angaha.
“Jaskuni gisepon Meghalaya a·dokko ODF Plus-o 10 percent-oni 84.33 percent-ona tang·doatna man·aha aro ia ian Meghalaya a·dokko a·song gimiko nambatsranggipa dam 10 a·dokrangoni damsa ong·atna gita sorkari aro department-ni on·kange kam ka·aniko mesokani ong·enga,” ine Sangma aganaha.
Ia jabol chimonggipa garirangko dingtang dingtang biaprango songdongenggipa manderangna suale on·aniara, a·doko songdongenggipa manderang baksa sorkarini ku·mong nangrime kam ka·na ja·ku de·chakatani ong·enga ineba Chief Minister aganaha.
“A·doko songdongenggipa manderang baksa chinga miksongani aro ka·oksiani gnang kamrangko ka·ahaon, dingtanganikode nikna man·gnok,” ine ua aganaha.
Ia bilsionin a·bachenge, an·tangtangni jillarangko aro songjinmarangko rongtal an·tale rakkina gita district ge·anti, block ge·anti aro songantion, sorkari aro mande sakantian jagittamprako apsan nangrime an·tangtangko gital dake on·kangtaianiko dakanggen ineba Chief Minister parakataha.
Rongtal an·tale janggi tanganiara Tribal aro India a·songo songdongenggipa manderangni mongsonggipa dakbewalan ong·a ine janapatengon, “Ia dakbewal rikbewalko badiaba somoirangonin an·ching ja·rikbana man·jaha indiba da·o an·ching an·chingni pagitcham ma·gitchamrangni dakbewal rikbewalko ja·rikna gita an·tangtangko gital dake on·kangtaiani somoi ong·engaha,” ine Sangma aganaha.
Ia program-ko ong·atanio a·dokni PHE Minister Marcuise Marak-ba jinmana aganprakangengon, 2024-2025 bilsina manchisogimin kamrangni bidingo janapatenba, a·dokko ODF Plus-o 100 percent gapatani, PMAY beneficiary-rangna dam 1553 latrine-rangko on·e dam 1,10,240 latrine-rangko rike on·na, dam 570 Community Sanitary Complex Unit-rangko rike on·na aro Fecal Sludge Management-ni dam 18 unit-rangko kulianian ong·enga ine parakataha.
