SHILLONG: Re·baenggipa February 16 tarikoni a·bachengatenggipa Meghalaya Legislative Assembly-ni Budget Session-o Assembly-ni membor-rang, ku·tangtangko jakkalanio Artificial Intelligence (AI)-ni dakchakanichi pe·timna gita ia budget session-ona sorkari, u·i-ma·sigipa manderangko okamatenga ine Bristibar salo, Meghalaya Assembly-ni Speaker Thomas A Sangma, Business Advisory Committee (BAC)-ni tom·ani ja·man kobor ra·timgiparangna parakataha.
Sangma-ni parakatani gitade, Assembly-ni session-rangko ong·atanio, Garo aro Khasi-Jaintia ku·sikrangchiba membor-rangna aganna cholko on·na miksongengani gimin da·o budget session-ode ku·sikrangko pe·timanio Artificial Intelligence (AI)-ko jakkalna gita uamang, dingtangmancha u·i-ma·sigipa manderangko okamatenga.
Garo aro Khasi-Jaintia ku·sikrangko membor-rang ma·sigriktokkujaengani gimin ku·sikrangko pe·timanio AI-ko jakkalna gita uamang u·i-ma·sigipa manderangni dakchakaniko nangnikenga ineba ua aganaha.
“Uni gimin ia chang budget session-ona chingni okamatenggipa manderang re·bae ku·pattianirangko on·anggen,” ine Sangma aganaha.
Assembly-o lekka jakkalaniko chu·gimik bon·atsrangna uamang nangnikenga ine janapatengon, da·o dipet lekka jakkalaniko chu·gimikde bon·atsrangna man·kujaenga indiba bang·bata membor-rangan iako ra·chaktokahani gimin kamrang bewalde matchotangengaha ine Assembly Speaker parakataha.
Speaker-ni parakatani gitade, ia chang budget session-ko February 16 tarikoni a·bachengate, February 27 tariko matchotatgen aro ia session-o private membor-rangni business ba kamrangna salgittamko aro sorkarini kamrangna salbongako jakkalanggen.
2024-25 bilsini budget-ko February-ni 21 tariko a·dokni Chief Minister, Assembly-o mesoke on·angskagen ineba Sangma parakataha.
