SHILLONG: Shillong songjinmani Mawdiangdiang-o rikenggipa Meghalaya Legislative Assembly-ni gital building-ko rikani kamrang ka·sinengani gimin Bristibar salo, Meghalaya Assembly-ni Speaker Thomas A Sangma, an·tangni suk ong·gijaniko parakangaha indiba ia gital Assembly nokko donsogimin somoi gitan ia 2024 bilsini September jao matchotgen ine an·tangni ka·dongsoenganiko parakataha.
Bristibar salo, Assembly-ni Speaker, Mawdiangdiang-o rikenggipa gital Assembly nokko nieani ja·man, ia gital Assembly nokko rikani kamrang ka·sinenga ine an·tangni suk ong·gijaniko parakataha.
“Kamrangko ta·rakbatatchina gita anga contractor-rangko aganaha aro gital Assembly building-ko nieanio anga kam ka·giparang baksa agangrikon, building-ko rikanio nanggipa bosturang somoi gita sokbajaengani a·selsa ka·sinenga ine ma·sina man·aha. Ia Assembly-ni main hall ba central hall-o silgrakchi tarigipa protchong donggen aro nangchongmotgipa bosturangoni 50 percent-de sokbaaha,” ine Sangma aganaha.
Central hall-na agrede bang·bata kamrangan matchotangengaha ineba Assembly Speaker parakataha.
“Gital Assembly building-ni central hall-ko March jani gisepon matchotgen ine angna ku·rachakaniko on·ataha. Ia nokko rikanio anga an·tangan gisik nange nirokenga aro ia Assembly nokko somoi gita matchotatna anga pangnan kamrangko nirokjringgen,” ine Sangma aganaha.