SHILLONG: Parliament-o regional party ba joltangni political dolrangde maming kamrangkon ka·na man·jawa ine badiaba badiaba national party-rang matnangtokengani gimin Meghalaya a·dokko man·e on·gipade joltangni political dolrangan ong·a ine UDP aro HSPDP dolrangni nangrime watatenggipa Regional Democratic Alliance (RDA)-ni candidate Robertjune Kharjahrin parakatskaaha.
Mawkyrwat-o RDA-ni tom·bimonganiko ong·atanio jinmana aganprakatengon, bang·a manderangan regional party-rangni bilakgipa ong·aniko ma·sitokkuja aro itihasrangko name ma·sikuja indiba Assam-ni somoio APHLC aro HSPDP dolrangsa Meghalaya a·dokko man·dile on·giparang ong·a ine Kharjahrin parakataha.
“Maini gimin anga joltangni political dolrangko seokaha aro Parliament-ona re·angode anga saksan sak 500-na batgipa MP-rangni mikkango maiko dakna man·gen ine sing·tokenga. Indiba anga iako na·simangna gisik ra·atna nangnikenga, chong·motan Meghalaya a·dokko man·e on·ani ja·man MP sakgni Prof GG Swell aro Maieit Hoping Stone Lyngdoh-ko joltangni political dolrang watataha aro Prof Swell-ko Lok Sabha-ni Deputy Speaker-na seokani ja·man ian a·dokni mikkim rasong ong·aha. Ia dilgipa sakgnimangmangan, Parliament-o a·dokni dingtang dingtang nanganirangna ku·rang on·na man·aha,” ine ua aganaha.
APHLC aro HSPDP dolrangan ua somoio Meghalaya a·dokko on·china a·songni Prime Minister Indira Gandhi-ko didina man·aha ong·ode da·alo apsan daken joltangni political dolrang, Meghalaya a·dokna ILP-ko on·china, Khasi/Garo ku·sikrangko Eighth Schedule-o chapatchina aro Assam-Meghalaya a·dokni simarango ong·enggipa golmalrangko namatna gitaba dabina man·aigen ineba RDA-ni candidate aganaha.
