SHILLONG: Batanggimin chang Assembly session-rango gitan ia chang Assembly session-oba dingtang dingtang minister-rangni aganchakanirangko on·anio, a·dokni Chief Minister Conrad Sangma-sa talatanirangko on·taina nangengani gimin NPP-chi dilenggipa Meghalaya Democratic Alliance (MDA) sorkarini minister-rang, an·tangtangni department-o ka·enggipa kamrangni giminan name ma·sitokjakon ine nikatna man·a.
Batanggimin chang Assembly session-rangoba, dingtang dingtang minister-rangni aganchakanirango Chief Minister Conrad Sangma-sa, talattaianirangko on·enba, minister-rangni kratcha·na nangaoniko jokatrongachim ine nikna man·a.
Mongolbar salni budget session-oba dingtang dingtang minister-rangna on·gipa mingbri sing·anirango minggni sing·anirangkode Chief Minister Conrad Sangma an·tangsa chakatenba, talatanirangko on·taina nangahachim.
Meghalaya a·dokni Animal Husbandry & Veterinary Minister AL Hek-ko dingtang dingtang Opposition MLA-rangni sing·anio, Chief Minister Conrad Sangma-sa chakatenba, Meghalaya a·doko Veterinary Hospital-ko rikna sienga ine parakataha.
Apsan daken, gue game cha·giparangni bidingo a·dokni Agriculture Minister Ampareen Lyngdoh-ko sing·anioba Chief Minister Conrad Sangma-sa chakate, gue game cha·enggiparangna sorkarini on·enggipa dakchakanirangko talate on·angaha.
Chief Minister-ni aganchakanio maming ong·gijani dongjagenchimoba, MDA sorkarini bang·bata minister-rangan aganchakanirangko name taritokjahakon ba an·tangtangni department-ni kam ka·anirangko name ma·sitokjakon mitam manderang aganskaaha.
MDA-I sorkarini somoioba da·o gita Assembly session-ni somoion a·dokni Chief Minister Conrad Sangma, Sports Minister-ni aganchakani pal aganchakaniko on·e, uko kratcha·aoniko jokatahachim.
