SHILLONG: Meghalaya a·doko Veterinary Hospital-ko Upper Shillong-o kulina gita a·dok sorkari, gong kror 30 tangkarangko ma·mong sorkarioniko bi·ataha ine Mongolbar salo, a·dokni Chief Minister Conrad K Sangma parakataha.
“A·dokni Veterinary Hospital-ko Upper Shillong-o kuligen aro iana chinga Prime Minister’s Development Initiative for North East Region (PM-DeVINE)-ni ning·o gong kror 30-ni proposal-ko ma·mong sorkarina on·ataha,” ine Sangma aganaha.
Iana skang, a·doko veterinary hospital-ko kuliani bidingo Opposition dolni dilgipa Ronnie V Lyngdoh, Assembly session-o chanchirimdilangengon, a·dokni Animal Husbandry & Veterinary Minister AL Hek an·tangan saksa BJP-ni dilgipaba ong·ani gimin a·doko veterinary hospital-ko kuliani bidingo Prime Minister baksa agangrikchina ine mol·molatahachim.
Meghalaya a·doko wakrangni sianirangko champengna gita ja·kurangko de·ja ong·ode game ge·e cha·enggiparangna aro jila kaanirangko dake cha·enggipa manderangna wak bi·sarangko sualanio maming orto dongjawa ineba Lyngdoh aganaha.
Wakrangko jile cha·enggipa manderangni je wakrangan siahachim, uamangna compensation-ko on·skachina gita Mawhati-ni Congress MLA Charles Marngar a·dok sorkariko didiangskaaha.
Iana aganchakaniko on·angskaengon, wak jile cha·enggipa manderang wak mangpraknan insurance-ko a·kange ra·na man·ani gimin da·o dipet wak jile cha·enggiparangna sorkari compensation-rangko on·a dongkuja ine a·dokni Animal Husbandry & Veterinary Minister AL Hek parakataha.
