SHILLONG: South Garo Hills a·jao dangdike on·enggipa Catholic Sister saksako Assam a·doko kragija dakahani gimin Sukrobar salo, Meghalaya State Commission for Women (MSCW)-ba raken jegalataha.
Re·anggipa antio, South Garo Hills a·jani Siju Parish-o kam ka·enggipa Sister Rosemary-ko Assam a·dokni Goalpara jolo, bus garini conductor aro gario songreenggipa mitam manderang, uni toromko aro uni olakkiani bewalrangko chonnike aganahachim aro Dudhnoi-oni Goalpara-ona re·angengmitingo sikdikdikgipa biap damsao uko garioniko a·rikgale galangahachim ine nikna man·a.
Ia a·selni bidingo MSCW-ni dilgiparang suk ong·gijaniko parakatengon, “Me·chik aro toromigipa mandeko iandake dokkol ka·aniara ia me·chikna namen gisikni gita dongtogijaniko ong·atna ama. Uni gimin ia a·selni bidingo apsan agangrikenba, dos dakgipa manderangna sastiko on·china Commission, Meghalaya aro Assam sorkarirangko didiatenga,” ine MSCW janapataha.
Meghalaya a·dokara pilak toromo bebera·giparangni a·dok ong·ani gimin Constitution-ni dongimin niamrangko ja·rikna gita nangchongmota ineba MSCW parakataha.
A·dok damgnini manderang, toromskako mande ra·grikchina aro saksa sakgipin baksa meli nangrimao tangangkuchina gitaba Commission, an·tangtangni skaniko parakataha.
“Uni gimin a·dok damgnini sorkarirang, tom·tomaniko rakkiangkuna aro iandake toromi manderangni kosako kragija dakgipa manderangna rakbatgipa sastirangko on·na gita apsan chanchirimna nanga,” ine MSCW parakataha.
