Shillong: Shillong Bar Association (SBA), uamangna kam ka·chakna gita biapko sandie on·china gita Sombar salo Chief Minister, Conrad K. Sangma-ko didiaha.
Re·anggipa February 24 tariko rasong gribee uamangni nokko wa·al kamani ja·mano SBA-ni delegation, mijalo Chief Minister-ko uni office chamber-o grongenba Association-ni, memberrang/lawyer-rangni neng·nikanirangko agan-janapeaha.
Bar-ni memberrangni, manderangni namgnina aroba District-o court-ni kamrangko ja·donggaatani gri kamrangko ka·na man·na gita Shillong Bar Association nokapo nok rikpiltaina gita ta·rakale tangka-paisarangko chamchina gitaba SBA delegate-rang, Chief Minister-ko mol·molaha.
Indake ong·engon SBA-ni parakani gitade, uamangni neng·nikanirangko chu·gimik chakpaaniko on·na aro man·na dipet cholrangko sandie dakna gita ka·dongataniko aganaha.
SBA delegation, a·dokni Law Minister, Ampareen Lyngdoh-koba grongaha, jean uamangna ka·sachakani kattarangko aganaha aro cholrangko sandie kam ka·e on·na gitaba ua aganataha ine SBA parakaha.
