Garo ku·sikchiba pe·na kamrangko a·bachengaha
SHILLONG: Meghalaya a·doko aro mongsongbate Khasi aro Jaintia Hills-ni songadam nokadamrango donggipa manderang, bi·sarangko kragija dake kal·akani somoirango nanga gita ja·kurangko de·na man·na gita Meghalaya a·dokni State Commission for Protection of Child Rights (SCPCR), POCSO Act 2012-ko Khasi ku·sikchiba pe·e on·ahani gimin a·doko songdongenggipa manderang SCPCR-ko mitteltokaha.
Ia POCSO Act-ko Khasi ku·sikchi pe·e on·aniara bi·sarangni kosako ong·gija dakanirangko champenganio ja·ku de·chakatani ong·aha ine Meghalaya National Law University-ni Registrar Kerpa Meida Lyngdoh Nongbri parakataha.
“Ian chu·soksranggipa kamde ong·kujanaba gnang maina an·chingo chel·chakna nangkuenggipa dingtang dingtang ra·bianirang gnang. Indiba ian POCSO Act-ni bidingo manderangna ma·siate on·ani kam ong·ahani gimin ja·ku de·chakatanide ong·chongmotaha,” ine Nongbri aganaha.
POCSO Act-ni bidingo ma·siate on·na jotton ka·engani gimin SCPCR-ko mittelpilangengon, ia niamko pe·aniara altua kam ong·jachim ine Nongbri parakataha.
Gipin ku·sikrangchiba ia POCSO Act-ni bidingo pe·na nangengani gimin janapatengon, ian bi·sarangna chel·chakani aro ainni gita dakchakanirangko on·na dongimin niamrang ong·ani gimin manderang pilakan ia Act ba niamni gimin ma·sitokna nanga ine Nongbri aganaha.
Nongbri-ni aganani gitade, ia niamni bidingo manderangko ma·siatna man·genchimosa ia POCSO Act-ko chu·sokgipa ong·atnade man·gen.
“A·doko songdonggiparang ong·e an·ching, bi·sarangni kosako ong·gija dakanirangko ba drae til·ekanirangko nikon ba knasoon ku·rang on·na nangani daitorangko ma·sina nangchongmota,” ine KNLU-ni Registrar aganaha.
POCSO Act-ni gamchatgipa ong·ani gimin janapatengon, “POCSO Act-na skangde an·chingo Indian Penal Code-san dongaiachim, jeon bi·sarangni kosako ong·gija dakani giminde bang·e janapanirang dongjachim. Indiba ia niamko ra·gatanichi an·ching bi·sarangni kosako ong·gija dakanirangko jako ra·na gita cholrangko man·aha,” ine Nongbri aganaha.
Indake ong·engon, POCSO Act-ni gimin Garo ku·sikchiba pe·na kamrangko a·bachengatengaha ine SCPCR-ni chairperson Iamonlang M Syiem parakatskaaha.
