SHILLONG: Garo National Liberation Army (GNLA) bobil dolko bikottaiaha ine social media-rango parakatani ja·man police-rang am·sandianirangko dakenba sakgittamkode rim·na man·aha ine Mongolbar salo, North Garo Hills a·jani Superintendent of Police (SP) BA Sangma parakataha.
Shillong songjinmani Police headquarter-o kobor ra·timgipa manderang baksa agangrikengon, GNLA bobil dolko bikottaiaha ine social media-rango parakatani ja·man am·sandianirangko dakon, bobil dolko bikottaianio saksni ba sakchetmangni gita manderang jak donga ine ma·sina man·aha aro da·o dipet ia manderangoni sakgittamkode rim·na man·aha ine SP parakataha.
Ia manderangni gimin police-rang am·sandianirangko dakengkua aro ia manderangko rim·na man·kujaskal police-rang sandiangkugen ineba Sangma aganaha.
An·tangko GNLA bobil dolni chairman ine soi ka·enba saksa Goera Pantora Sangma minggipa mandeni bimingo, batanggimin salrangonin social media-rango GNLA bobil dolko bikottaiaha ine watpriprana a·bachengatahachim ine nikna man·a.
Uni ja·man, bobil dolni bimingo tangkarangko dabienga ine re·anggipa February jani 24 tariko Kharkutta Police Station-o FIR ka·aniko man·soaha aro ia FIR-o pangchake police-rang, am·sandianirangko dakna a·bachengaha ine North Garo Hills SP parakataha.
SP-ni parakatani gitade, iani bidingo rim·ako man·gipa mande sakgittamara, saksade Resubelpara-oni bilsi 40 ong·gipa Singsan K Marak, saksade Adokgre-oni bilsi 40 ong·gipa Tilja Sangma aro sakgipinara Adokgre-oni bilsi 32 ong·gipa Surya Sangma ong·achim.
Ia manderangoniko police-rang, uamangni tangka dabina jakkalenggipa mobile phone baksana SIM card-rangkoba rim·aha ine SP aganaha.
Rim·ako man·gipa Singsan Marak-de batanggimin somoirangoba bobil dake chakatgipa dolrango napgimin mande ong·achim aro North Garo Hills a·jao uan da·oba bobil dolko bikotdilenggipa manderangoni saksa ong·a ineba SP aganaha.
Ia mandeko Assam Police-rangba sandienga aro Assam Court-ni gitaba NBWA-ko on·ahani gimin Meghalaya Police-ni gita uni kosako am·sandianirangko matchotani ja·man uko Assam Police-na pakwate on·anggen ine Sangma aganaha.
