TURA: West Garo Hills a·jani Tura-o IT Park-ko aro Dalu-o Football Stadium-ko rikna gita re·anggipa Sonibar salo, a·songni Prime Minister Narendra Modi, pangchakani ro·ongko internet gita songe on·ataha.
Pangchakanirangko songe on·na gita dingtangmancha program-ko Arunachal Pradesh a·dokni Itanagar songjinmao ong·atangaha aro ia program-ko West Garo Hills Deputy Commissioner (DC) office complex-oba live mesokangaha.
Ia program-ko internet gita live mesokatanio, West Garo Hills a·jani Deputy Commissioner Jagdish Chelani, dingtang dingtang department-ni officer-rang, dingtang dingtang college aro skulni skigiparang, chatro chatrirang aro gipinrangba dongpae bak ra·angtokaha.
Sonibar salo, a·songni Prime Minister salsana Arunachal Pradesh a·dokona re·ange Viksit Bharat Viksit Northeast program-o bak ra·angaha aro a·gilsako dal·batsranggipa twin lane tunnel ‘Sela Tunnel’-ko oprake on·angenba Dibang Multi Purpose Hydropower Project-naba pangchakaniko songe on·angjolahachim.
Uni ja·man ua salgro salaram jolni damdok a·dokrangna gong kror 55,000-mang ong·gipa project-rangko oprake on·angan baksana pangchakanirangkoba songe on·angjolaha. Ia damdok a·dokrangara, Arunachal Pradesh, Sikkim, Tripura, Nagaland, Manipur aro Meghalaya a·dokrang ong·achim.
Ia project-rangoni kror 300-ni project-rangde Meghalaya a·dokna ong·a.
