SHILLONG: Meghalaya a·doko songdongenggipa manderangna bijoli nambate on·na gita sorkari jotton ka·enga ine Robibar salo, a·dokni Chief Minister Conrad K Sangma parakataha.
Iani bidingo kobor ra·timgipa manderang baksa agangrikengon, mikkangchi bijoliko on·anio nambatgnok aro ia bilsioba manderang, bijoliko nambate man·gnok ine Chief Minister ku·rachakaniko on·ataha.
“Meghalaya a·doko bijolni gita chagrongna nangenggipa neng·nikanirangko chu·gimik namatsrangna gita chinga kamrangko ka·enga. Oe beben, bang·en dakna nanganirang dongkuenga,” ine Sangma aganaha.
Meghalaya a·doko dingtang dingtang power project-rangko namdapatna gita adita salrangna skangsan a·dokni Cabinet, Draft Meghalaya Power Policy 2024-ko ra·chakangahachim ine nikna man·a.
Meghalaya a·doko Hydro power-ko 3000 MW-mangni gita man·ani cholrang dongengoba da·o dipet 13 percent-mangni gitasan jakkalna man·kuengachim. Da·o dipet a·doko bijoli bikotna man·aniara 378 MW ong·e 3 MW-koba da·o rikengkuachim.
Gital power project-rangna DPR-ko tarina gita komibeoba jadokoni bilsisamangkode department-rang somoi nangkuaigen ine janapatengon, bang·a department-rangon UC-rangko on·na man·jani a·selo a·dokna miksonge watatgipa tangka paisarangko indin watatpilna nangahachim ine Chief Minister parakataha.
“Darangkoba matnangna ba jaksi otna miksonge iako aganenga ong·ja indiba ian a·dokni obostarangan ong·achim. Da·alo an·ching bijolini gita obosta nambatrorobaenganiko nikna man·engaha,” ine Sangma aganaha.
Pilak kamrangon sorkari, kamrangko nambatatna jotton ka·enga ineba Chief Minister aganaha.
