SHILLONG: Re·baenggipa April jani 19 tariko ong·atna sienggipa Lok Sabha election-o dingtanganiko ra·bana gita Shillong parliamentary constituency-ni manderang, ‘rongtalgipa’ politics-na chakgen ine Voice of the People’s Party (VPP)-ni dilgiparang, an·tangtangni ka·dongchakenganiko parakataha.
VPP-ni ku·wattimgipa Batskhem Myrboh-ni aganani gitade, namroro silroroaniko ra·bana aro namgipa sorkariko chalainade rongtalgipa politics-ko nangchongmota ine manderang da·o ma·sitokahani gimin VPP-ba ka·dongataniko man·paengaha.
Shillong parliamentary constituency-o VPP, bilakbate campaign-ko ka·anggen aro constituency-ni pilak kona noksikrangonan wenangna jotton ka·gen ineba Myrboh aganaha.
Dingtang dingtang political dolrang, ia Lok Sabha election-o namroro silroroaniko ra·bana aro manderangni neng·nikanirangko namatna ku·rachake susatokengon, VPP-de tangka paisa jakkalsretaniko aro parak pasang ong·aniko ra·bana miksonganio susaskaenga ineba Myrboh parakataha.
Ia chang Lok Sabha election-o VPP dol, skanggipa changna Shillong Parliamentary constituency-oni Ricky AJ Syngkon-ko candidate dake susaatengachim ine nikna man·a.
