AMPATI: Budbar salo, World Oral Health Day-ko South West Garo Hills a·jani Rerapara C&RD Block-ni ning·o donggipa Dorambok songni Urban Health & Wellness Centre-o maniangaha.
Ia salko South West Garo Hills a·jani National Oral Health Program manidilangaha aro ia program-ko ong·atanio, South West Garo Hills a·jani District Medical & Health Officer (DM&HO) Dr H Barman, dingtang dingtang health officer-rang, health worker-rang, Dorambok songni Nokma PT Sangma, skulo poraienggipa chatro chatrirang, skigiparang aro songni manderangba bak ra·angtokaha.
Ia salko maniani bak gita dingtang dingtang sabisini porikka ra·ani, dental ba wagamrangko rongtale rakkiani bosturangko sualani, wagam porikka ra·e niani, aro malaria-ni bidingo awareness session-koba ong·atangaha.
Unbaksana ia salko manianio, chatro chatrirangna quiz, dancing aro singing competition-rangkoba ong·atangaha aro chegiparangna boksisrangko suale on·angaha.
Ia program-ko ong·atanio, Malaria-ni bidingo District Malaria Officer Dr Lydia Marak agan-talate on·angaha aro wagamrangko an·seng baljoke rakkiani bidingo Oral Health Program-ni District Nodal Officer aro Dental Surgeon Dr Cornelius R Marak, agan-talate on·angskaaha.
Ia tom·anio Dorambok songni Nokma PT Sangma-ba jinmana aganprakengon, songni namgnina iandakgipa program-ko ong·atahani gimin medical dol gimikkon mittelpilangaha.
