SHILLONG: Meghalaya Legislative Assembly-o Hindi ku·sik jakkalaniko jegalanina Voice of the People’s Party (VPP)-ni candidate-ko seoke Parliamenta-ona watatgenchimode indinsa ong·gramaigen ine National People’s Party (NPP)-ni state president aro a·dokni Deputy Chief Minister Prestone Tynsong-ni agangipa kattarangko VPP jegalatenba, uni iandake matnanganiara ‘gokani’ kattarang gitasan ong·aia ine matnangatskaaha.
Assembly-o Hindi ku·sikchi agananiko jegalani gimin VPP-ni candidate-ko seoke Parliament-ona watatgenchimode indinsa ong·aigen maina Parliament-ode Hindi ku·sikkosa jakkalbatronga ine adita salrangna skangsan Tynsong aganahachim.
“Lok Sabha election-o VPP-ni candidate-ko seoke Parliament-ona watatgenchimode, ua Parliament-oba Hindi ku·sikko jegale ong·kate kataigen aro bilsi bongana iandake bak ra·pana man·jawa ine adita salrangna skangsan mande saksa aganengachim. VPP-ara Hindi ku·sikko jegalgipa dolsa ong·a aro Parliament-ode gimikan Hindi-kosa agantokaha. Uni gimin VPP-ni candidate-ko seoke Parliament-ona watatgenchimode indinsa ong·gramaigen,” ine ua aganahachim.
Uni iandake matnanganiko jegalatskaengon, Parliament-ode English aro Hindi baksana Eighth Schedule-o man·chapgipa je ku·sikrangchiba aganna man·aia aro iako Tynsong an·tangan ma·sikujakon ine VPP-ni ku·wattimgipa Batskhem Myrboh matnangatskaaha.
“Parliament-ode membor-rang, English aro Hindi ku·sik baksana Eighth Schedule-o man·chapgipa jolni ku·sikrangchiba aganna man·aia ine Deputy CM ma·sijakon. Parliament-ode joljolan pe·timgipa donga ineba ua ma·sijaenggen. Iako ua ma·sia ong·ode Ampareen Lyngdoh-ko NPP-oni susana on·jawachimkon,” ine Myrboh aganaha.
NPP-ni Hindi-na chakaniara Khasi aro Garo ku·sikrangko Constitution-ni Eighth Schedule-o man·chapatchina dabianio bilgriatani gita ong·enga ineba ua aganaha.
