SHILLONG: Vishva Hindu Parishad (VHP) dolara Khasi aro Jaintia Hills jolni dol ong·ja ine Khasi Students Union (KSU) parakatenba, Khasi-Jaintia-rangni kamrango ‘napbrokjachina’ VHP-ko didiataha.
Adita salrangna skang, Ichamati-o Citizenship Amendment Act (CAA)-ko jegale KSU aro gipin dolrangni jinma tom·bimonganiko ong·atani ja·man gipin jat mande sakgniko so·otani gimin VHP-ni President Droupadi Murmu-na badi ka·e sedoatgipani bidingo janapatengon, “VHP-ara gipin biapni dolsa ong·ani gimin ching jatni kamrango napbrokjachina chinga uamangko didienga. Gipin a·dokrango ong·enggipa obostarango chingaba jak on·jani gimin uamangba Khasi-Jaintia-rangni obostao jak on·na nangja,” ine KSU-ni general secretary Donald V Thabah parakataha.
VHP pilak jatrangnan simsakgipa a·songni dol ong·a ine a·kangmikenga ine matnangatengon, Meghalaya a·doko tol·pinapgipa cholrangchi niam gri napsrukbagipa manderangnasa uamang simsakskaenga ine Thabah parakataha.
“Pilak jatrangni namgninan kamko ka·bebegipa dol ong·genchimode Tribal jatrangni neng·nikanirangkon skanggipa VHP niatchengna nanga. Ian uamangni tol·pinapaniko mesokanisan ong·aia,” ine KSU-ni general secretary aganaha.
Meghalaya a·doko ong·enggipa obostarangna VHP simsakbebegipa ong·genchimode, re·anggipa bilsini Robibar salo Grace Covenant Church aro Laban Presbyterian Church mikkang gita re·jomanggipa an·tangtangni membor-rangkon sing·sandichengna nanga ineba ua aganaha.
Thabah-ni aganani gitade, re·anggipa bilsini Robibar salo, Kristianrangni gilja ka·engmiting somoio VHP-ni membor-rangan, ‘Jay Shree Ram’ aro uandakgipa kattarangko chrik a·boke, Kristianrangni olakkianiko golmal ka·ahachim.
“Chinga VHP-na kenja aro Khasi-Jaintiarangni kosako bil man·na on·jawa,” ine ua aganaha.
East Khasi Hills a·jani Ichamati-o badiaba dolrangni CAA-ko jegale jinma tom·bimonganiko ong·atani ja·man dosgri Hindu mande sakgni, chong·motan Ishan Singh aro Sujit Dutta-ko ka·saninggija dake so·otaha aro so·ota man·gipa mande sakgnini nokdangrangna kakket bichalko on·na man·na gita ia a·selni bidingo CBI ba NIA-ni sandirokanirangko dakatna nanga ine adita salrangna skangsan VHP, a·songni President-na sedoatahachim.
“A·sel ong·gipa biapara Sixth Schedule a·jao ga·akgipa biapsa ong·e CAA-o nangchakegipa biap ong·jachim aro ia biapon dingtang dingtang dolrang, CAA-ko jegale jinma tom·bim ong·atani ja·man, dosgri Hindu mande sakgniko ma·sina man·gijagipa manderang so·ote galskaaha,” ine VHP-ni secretary general Bajrang Bagra parakatahachim.
