SHILLONG: North Garo Hills a·jani Superintendent of Police (SP) Bruno A Sangma-ni kosako saksa Nilberth Ch Marak minggipa social activist-ni badi ka·enba uko kam apjitatchina dabianiko Election department sandirokchengna tik ka·angaha.
Iani bidingo Meghalaya a·dokni Chief Electoral Officer (CEO) BDR Tiwari-o sing·sandiaton, dingtang dingtang niamrangko ja·rikna nangani gimin North Garo Hills SP-ni kosako maming ja·kurangko de·na skangba department-ni gita sandirokchengna nanggen ine parakataha.
“SP-ni kosako matnanganirangara kakket ong·ama ong·ja uko chinga sandichengna nanggen aro iani bidingo ching a·dok sorkarioniko report bi·atgen,” ine Tiwari aganaha.
North Garo Hills a·jani SP Bruno A Sangma-ra Tura-ni MP aro NPP-ni candidate Agatha K Sangma-ni segipani boninggipa ong·achim aro ua apsan a·jao songdonggipaba ong·achim.
Iani bidingo Chief Election Commissioner-na badi ka·e sedoatengon, NGH-ni SP Bruno Sangma aro South Garo Hills a·jao donggipa Gasuapara-ni Customs Officer, chini, rasin, gue aro uandakgipa ma·manti bosturangko Bangladesh a·songona niam gri badingatna gita cholrangko on·enga ineba Marak matnangatahachim.
Lok Sabha election-na MCC-ko ra·gatani ja·manba NGH-ni SP, a·dokni Chief Minister aro gipin dilgiparangko an·tangni nokona okamataha ineba ua, CEC-na badi ka·doatenba, SP-ni kosako nanga gita ja·kurangko de·china aro ta·raken dingtang biapona apjitatchina gitaba didiatahachim.
