SHILLONG: Budbar salo, East Khasi Hills a·jani Mawlai Mawroh-o nok rikenggipa mande sakgittamko ma·sina man·gijagipa dolsa manderangni chadrapani a·sel sakgittamoni saksa so·otako man·na nangahani gimin National People’s Party (NPP) aro Bharatiya Janata Party (BJP) dolrang jegalatenba, iani bidingo ta·raken ja·kurangko de·china aro dos dakgipa manderangko rim·china police-rangko didiataha.
Ia a·sel ong·aniko NPP-ni gita matnangatengon, “Dos dakgipa manderangko ta·raken rim·na man·na gita ja·kurangko de·china chinga police-rangko didiatenga,” ine NPP-ni ku·wattimgipa HM Shangpliang parakataha.
Apsan daken a·dokni BJP dolba ia a·selni bidingo dos dakgipa manderangko jegalata aro dos dakgipa manderangko ta·raken rim·china police-rangko didiataha.
Ia a·selni bidingo a·dokni Chief Minister Conrad Sangma aro ma·mong sorkari baksa agangrikenba, dos dakgipa manderangni kosako rakgipa ja·kurangko de·china didiatgen ine BJP MLA aro a·dokni Cabinet Minister AL Hek, ku·rachakaniko on·ataha.
Iandake dosgri mandeko chadrapanina jegalatengon, ka·saninggija dakgipa kamrangko nie dongjawa aro dos dakgipa manderangni kosako rakbatsranggipa ja·kurangko de·anggen ine Hek parakataha.
Budbar salo, East Khasi Hills a·jani Mawlai Mawroh-o nok rikani kamrangko ka·enggipa mande sakgittamko ma·sina man·gijagipa manderang chadrapeaha aro ia manderangni jako dokako man·e ia mande sakgittamoni saksade siangna gita nangahachim.
Sianggipa mandeara Nongmynsong-oni bilsi 52 ong·gipa Arjun Ray ong·achim ine ma·sina man·aha.
Ia a·selni bidingo talataniko on·angengon, Budbar salni 11:15 bajimango ma·sina man·gijagipa dolsa manderang, Mawlai Mawroh-o nok rikenggipa biapona re·ange, kam ka·enggipa mande sakgittamko chadrapeaha aro ia manderangni jako dokako man·e uamangoni saksade bilongbee saknaanirangko man·aha ine East Khasi Hills a·jani SP Rituraj Ravi parakataha.
Bilongbee saknaaniko man·ahani gimin ia mandeko bakan Shillong songjinmani NEIGRIHMS-ona sanna gita ra·angahachim indiba ua hospital-on siangaha ineba SP parakataha.
