TURA: Re·anggipa April 9 tarikoni April 11 tarikona, West Garo Hills a·jao donggipa ICAR-KVK-ni gita jilla kaanirangko dakani bidingo awareness aro training program-ko Tura-ni KVK campus-o ong·atangaha aro ia program-ko ong·atanio West Garo Hills a·jani dingtang dingtang biaprango, wak, matchu, do·o, do·bok aro uandakgipa matburingrangko jilenggipa manderang bak ra·angtokaha.
Ia training program-ko Haryana a·dokni Karnal-o donggipa ICAR-National Bureau of Animal Genetic Resources (NBAGR)-ni dakchakanichi ong·atangaha.
KVK official-rangni u·iatani gitadem da·o dipet rokom 53 matchu, rokom 20 matma, rokom 39 do·bok, rokom 45 mes, rokom 8 gure, rokom 9 ut, rokom 14 wak, rokom 3 gada, rokom 3 achak, rokom 1 yak, rokom 20 do·o, rokom 3 do·gep, rokom 1 rajahas aro uandakgipa jila kaanirangko Haryana a·dokni Karnal-o donggipa ICAR-NBADR-o register ka·aha.
Garo Hills-ni Wak Chambil-koba 2022 bilsio register ka·aha ine KVK official-rang parakataha.
Ia awareness aro training program-ko ong·atanio jile kae cha·enggipa manderangna agan-talate on·anggipa manderangara, WGH KVK-ni STO Dr Sagarika Borah, Umiam-o donggipa ICAR-RC for NEH Region-ni Scientist aro PI Dr Sourabh Deori, West Garo Hills a·jani Babadam-o donggipa Veterinary Dispensary-ni AH & Veterinary Officer Dr Eljitha, East Garo Hills a·jani Williamnagar-o donggipa Poultry Development-ni Sr Veterinary Officer Dr Eldora Ch Momin, KVK-ni CTO Dr Tarun Kr Das, WGH KVK-ni Head Dr Monica Singh aro gipinrang ong·a.
Ia salgittamna ong·atgipa training program-o, Nengjabolchugre, Aminda Simsang, Aminda Rangsa, Dengnakpara, Selbalgre aro Marapara songrangoni gimik sak 40 jile kae cha·enggipa manderang skie ra·angskaaha.
