‘Ki·tapna pu·onanichi Mongnal bibalskagen’: Hek
SHILLONG: Batanggimin somoirango National People’s Party (NPP)-chi dilenggipa Meghalaya Democratic Alliance (MDA) sorkarini kosako tangka paisarangko jakkalsretanina Meghalaya a·doko Bharatiya Janata Party (BJP)-ni mitam dilgiparang changni chang matnanganirangko dakahaoba ia chang Lok Sabha election-o a·dokni damgni constituency-on susagija NPP-na chakskana tik ka·ahani gimin BJP-ni dilgiparang, NPP-ni candidate-rangna campaign-ko ka·skaengaha.
Sonibar attamo dingtangmancha BJP-ni gita Shillong-o tom·aniko ong·atangenba, NPP-ni candidate Ampareen Lyngdoh-na campaign ka·angaha.
Ia tom·anio a·dokni Cabinet Minister aro BJP-ni dilgipa Alexander L Hek, jinmana aganprakengon, Lok Sabha election-o NPP-ni candidate-ko seokchina manderangko didiangaha.
“Dingtang dingtang jat aro toromni manderang pilakan apsan ong·a aro dingtang dingtang dolrangni gisepo maming dingtanggrikani dongja,” ine Hek aganaha.
Meghalaya a·dokni Lok Sabha seat damgnion susagija, NDA aro MDA-o apsan bakrimenggipa NPP-na chakskachina Prime Minister Narendra Modi-ni ge·etaniko on·ahani giminba ia tom·anio ua talataniko on·angaha.
Ia Lok Sabha election-o ge 370-na baten seat-rangko chena gita PM Modi nisanko donmanaha ine janapatengon, ia election-o mikrontangtangko mikchipeba, NPP-ni ‘ki·tap’ noksao sikdepe pu·onchina gita Hek, BJP-ni manderangko mol·molangaha.
“NPP-ni candidate-ko seokanichi ‘mongnal’ bibalskagen,” ine ua aganaha.
Ia changoba New Delhi-o ‘Modi sorkariko’ aro 2028 bilsio Meghalaya a·dokoba ‘BJP sorkariko’ rikna man·na gita Meghalaya a·doko BJP-ko bilakbatatna gita rakbee kamrangko ka·angkugen ineba BJP Minister aganaha.
Ia tom·anio Meghalaya BJP-ni ku·wattimgipa Mariahom Kharkrang-ba jinmana aganprakengon, ia changode Meghalaya a·doko Narendra Modi aro BJP-ni noksa ‘ki·tap’-sa ong·enga ine parakataha.
“Ki·tap-na pu·onon na·simang Modi-na pu·onani ong·enga. BJP gride Meghalaya a·doko manderang namroro silroroaniko nikna man·jawa,” ine Kharkrang aganaha.
