TURA: Sukrobar salo ong·atenggipa Lok Sabha election-na skangmangmang Budbar salo, East Garo Hills a·jani Rongmil jolo, wa·al kame gopramo gopgimin mande sakgittamni manggisirangko police-rang man·aha.
Police-rangni kobor on·ani gitade, ia mande sakgittam gimaenga ine koborko man·soani ja·man police-rang, ia manderangko sandienba Rongmil joloniko ia mande sakgittamni manggisirangko gopramo gope galako man·aha.
Ia mande sakgittamara Assam a·doko donggipa Goalpara-oni ong·achim aro uamangoni sakgni, gari para ra·enba garini driver baksa Mongolbar pringwalonin ong·katbaahachim ine kobor on·aha.
Ia manderang, Mongolbar pring 6:00 bajimango, Damra rama gita re·bae East Garo Hills a·jao napani ja·man badiaba dokkano cha ringenga ine bon·kame nokdangni manderangna phone ka·ataha indiba uni ja·man uamangna phone ka·o man·taijahaon, uamangni nokdangni manderang jajrengenba, police-rangna kobor on·ataha.
Koborko man·soani ja·man police-rang am·sandianirangko dakon, ia manderangni ra·bagipa gariko Rongmil jolni buring damsao chu·gimik wa·al kamgiminkosa nikeaha.
Ia gariko man·gipa biap sambarangoniko police-rang am·sandiangkuon, ia manderangko so·otani ja·man gope galgipa gopramkoba nikeaha.
Koborko on·ani gitade, gopram damsao mande sakgniko aro gopram damgipino mande saksako gope galahachim.
Indake ong·engon, so·ote galako man·gipa mande sakgniara Goalpara Dolguma-oni Jamar Ali aro Nur Mohammed ong·achim indiba driver-ni bimingkode da·o dipet ma·sikujaenga ine police-rang u·iataha.
Election-na skangmangmang iandakgipa a·selko nikna man·ahani gimin jolni manderang namen aiao inmanbeaniko parakattokaha.
