SHILLONG: Meghalaya a·doko gital kulina sienggipa Captain Williamson Sangma State University-na a·dok sorkari da·o dipet Vice Chancellor-ko songkujaenga.
Iani bidingo kobor ra·timgiparangna talataniko on·angengon, Lok Sabha election-ni a·sel Captain Williamson Sangma State University-na vice chancellor-ko songna man·kujaenga indiba VC-ko songani kamrangde matchotangengaha ine a·dokni Education Minister Rakkam A Sangma parakataha.
Lok Sabha election-na donatgipa Model Code of Conduct (MCC)-ni somoi matchotahaon State University-ni Vice Chancellor-ko songgnok ineba Sangma aganaha.
Ia bilsini Budget Session-ko ong·ataniosan, a·dokni State University-ko ia bilsionin chalaina sorkari miksongenga ine Education Minister parakatahachim.
Indake ong·genchimoba, Lok Sabha election-ni a·sel Captain Williamson Sangma State University-ko mikkang 2025 bilsioni a·bachengatskana nanggnok ine Sangma parakataha.
Ia State university-ni Tura campus-na ge 100 kamrangko aro Shillong campus-na ge 6 kamrangko ong·katdapatna sorkari kam ka·engaha aro iana bilsiprako gong kror 45.7 korosko nangdapna sienga ineba Education Minister, Assembly-ni Budget Session-o aganahachim.
Captain Williamson Sangma State University-ko rikanio da·o dipet gimik gong kror 16.96 tangkarang koros ong·aha ine talataniko on·angengon, ia university-ni administrative block, academic block, boys hostel aro girls hostel-rangko rikani matchotmanaha ine Sangma parakataha.
Ia university-ni vice chancellor aro registrar-ko man·chape ge 58 kamrangkode sanction ka·manaha ineba ua aganaha.
Captain Williamson Sangma State University-na internal road aro water supply-koba sanction ka·manaha ine talatangengon, “Ia university-ni Board of Governors-ko songahani gimin ia board-ni skanggipa tom·aniko 2022 bilsini January 14 tariko, Education Minister-ni dilanichi ong·ataha,” ine Sangma parakataha.
