Dos dakgipa gipin manderangkoba rim·na sandikuenga
TURA: Adita salrangna skang, South West Garo Hills a·jani Garobadha jolo donggipa Gandhipara songo, me·chik bi·sa sakgniko drae til·ekanio jak donga ine chanchichipgipa mande sakbriko police-rang rim·aha ine u·iataha.
Re·anggipa April-ni 16 tariko, me·chik bi·sa sakgni, an·tangtangni ripeng sakgni baksa South West Garo Hills a·jani Gandhipara songo ong·atanggipa Chenga Benga Mela-ona re·angahachim.
Skanggipao, me·chik bi·sa saksa an·tangni me·asa ripeng baksa, mela-ko ong·atenggipa biaponi adita chel·kala biapona re·angon, ua biapo dolsa manderang uamangko timsoenba chadrapsoaha aro me·asako siboke dokani ja·man me·chik bi·sakoba doke sibokataha. Me·chik bi·sa sibokani ja·man, ia manderang me·chik bi·sako kragija dake kal·aka aro me·chik bi·sa sibokani a·sel ia manderangko ma·sirikjaha.
Iani ja·mano, sakgipin me·chik bi·saba, an·tangni me·asa ripeng baksa apsan biapona re·angon, uano ia apsan manderangan dongsoenba me·asa bi·sako kae dokaha aro me·chikkoba ia manderang kragija dake dokaha ine police-rang u·iataha.
Police-rangni u·iatani gitade, me·chik sakgnikon drae til·ekaha ine matnangtokahaoba medical-ni gita porikka ra·aniode me·chik saksakosan drae til·ekaha ine ma·sina man·ahachim indiba me·chik sakgni aro uamangni me·asa sakgnikoba ia manderang, bilongbee dokahachim.
Indake ong·engon, ia a·selni bidingo police-rang am·sandianirangko dakenba, chanchichipenggipa manderangoni sakbrikode rim·aha aro gipinrangkoba rim·na sandikuenga ine police official-rang u·iataha.
Dos dakgipa manderang bang·batan chadamberangsa ong·achim aro brebatgipaan bilsi 26-san ong·kuengachim ineba kobor on·timgiparang parakataha.
Ia a·sel ong·gipa biapara, Assam-ni sima sambaon ong·ani gimin dos dakgipa manderang Assam-onin ong·na nanga ine police-rang chanchichipahachim.
Uandaken, Meghalaya a·dokni police-rang, Assam-ni police-rang baksa kobor ra·grikenba, dos dakgipa manderangko sandina a·bachengataha aro dos dongna nanga ine chanchichipenggipa mande sakbriko rim·na man·aha.
Police official-rangni u·iatani gitade, rim·ako man·gipa mande sakbrioni sakgnide Assam-ni aro sakgnide Meghalaya-oni ong·achim.
Ia manderangko da·o police-rang sing·sandienga aro bakan gipinrangkoba rim·na ka·dongenga ine u·iataha.