SHILLONG: Adita salrangna skang, Jowai-ni St Mary Mazzarello Girls Higher Secondary School centre-o NEET-UG 2024-ko ra·anio QRST aro MNOP ine minggipa set-gni question paper-rangko candidate-rangna on·ahani a·sel porikkako segipa candidate-rang jajaaniko man·na nangtokahani gimin iani bidingo Meghalaya a·dokni Akhil Bharatiya Vidyarthi Parishad (ABVP) sing·doatenba, ia centre-o gital dake porikkako ra·piltaichina National Testing Agency (NTA)-o dabiangaha.
Ia centre-o set-gni question paper-rangko on·ahani gimin NEET porikkako ra·gipa official-rangko sing·doatengon, iandake ia centre-o NEET porikkako segiparangna set-gni question paper-rangko on·ahani a·sel chatro chatrirangni gisepo kenjagokani aro jajaanirang ong·kataha ine ABVP parakataha.
“Ia centre-o NEET porikkako segipa candidate-rangni admit carad-rangkoba invigilator ra·jaha aro iani bidingo sing·on, ian gital niamsa ong·a ine ua candidate-rangna aganchakaha. Indake ong·genchimoba, ja·mano candidate-rang porikka semane noktangtangona sokangpilahaosa uamangko centre-ona okamatpile uamangni admit card-rangko bi·atpilaha. Ian candidate-rangni gisepo jajaani aro kenjagokataniko ra·baani ong·aha,” ine Meghalaya ABVP-ni dilgiparang parakataha.
“Ia centre-o iandakgipa obostarangko nikna man·ahani gimin chinga, set-gni question paper-rangko on·ani bidingo talataniko on·china NTA-o dabienga,” ineba ABVP-ni dilgiparang parakataha.
Jowai centre-o candidate-rangna sualgipa set-gni question paper-rang dingtanggrika ong·ode ia centre-o NEET porikkako ra·piltaina nanga ineba ABVP dabiangaha.
