TURA: Ia sal somoirango Garo Hills-ni bang·bata biaprangon chiring chibisikrang tiproroangengahani a·sel manderang china neng·nikanirangko man·tokengahaon, South Garo Hills a·jani Allagre songo donggipa community health centre (CHC)-oba chirangko man·jaengani a·sel health centre-o sanna bananirangko on·enggipa manderang aro sanna bananirangko ra·na re·angenggipa pilakan neng·nikanirangko chagrongna nangtokenga ine kobor on·aha.
Ia CHC-o chirangko man·jaengani a·sel neng·nikanirangko chagrongna nangtokengani gimin adita salrangna skang ia jolo donggipa AHAM, GSMC, FKJGP aro jolo songdongenggipa manderang, CHC-ni official-rang baksa tom·aniko ong·atangaha.
GSMC Ashugre unit-ni publicity secretary Salman Ch Momin-ni u·iatani gitade, ia tom·aniko Allagre CHC hall-o ong·atangaha aro ia tom·anio songni dilgiparang, toromko dilenggiparang, CHC-o kam ka·enggipa official-rang aro songni manderangba bak ra·angtokaha.
Ia tom·anio dingtang dingtang dilgiparang chanchirimanio bak ra·angtokengon, CHC-o kam ka·enggipa doctor-nurse-rangni aro ia health centre-o sanna bananiko ra·na re·baenggipa manderangni neng·nikanirangko chel·chakna gita ta·raken chirangko sokate on·na nangengani gimin aganangtokaha.
Ia tom·anio Chokpot PHE-ni SDO-ba bak ra·angpae jinmana aganprakengon, ua salsnini gisepon Allagre CHC-ona chirangko sokate on·na jotton ka·gen ine ku·rachakaniko on·angaha.
