TURA: East Garo Hills a·jani Rongjeng-o donggipa sorkari skul sambao chu dokkan aro bonded warehouse-ko kulina sienga ine dingtang dingtang dolrang, chong·motan GSU, FKJGP, APA, ASWA, AOSW, NGCO, AAYF, GSMC aro ACFI dolrang parakatenba, ia skul sambao chu dokkanrangko kulina on·jachina East Garo Hills a·jani Deputy Commissioner-ko didiataha.
Ia NGO-rangni parakatani gitade, ia chu dokkan aro bonded warehouse-ko Rongjeng United Government UP skul sambao gital rikgipa building-o kulina siengachim aro ia building-ara skul nokoni metre 200-ba ong·jawachim.
Iani bidingo Rongjeng-ni NGO-rang, re·anggipa March jani 5 tarikon East Garo Hills a·jani Deputy Commissioner-na badi ka·doatahachim indiba iani bidingo maming ja·kurangko de·kujaengani gimin May-ni 7 tarikoba changsataie NGO-rang, Deputy Commissioner-na gisik ra·atpilaniko on·angtaiaha.
NGO-rangni badi ka·doatani ja·man Excise department-ni official-rang, ia biapona re·ange, mitam NGO-rangni dongpaanio ia chu dokkanrangni chel·grikaniko toe niangaha ine NGO-rang u·iataha.
“Ia skuloni chu dokkanona metre 67-mangsan chel·grikaia aro ian Supreme Court aro sorkarini dongimin niamko pe·ani gita ong·enga,” ine NGO-rang parakataha.
Ia chu dokkanni chel·grikaniko Excise department-ni manderang toe nina re·angahaoba da·alonan ia chu dokkan aro bonded warehouse-ko chipatna gita maming ja·kurangko de·kujaenga ineba NGO-rang parakataha.
“Ia chu dokkan aro bonded warehouse-na licence-ko on·engmiting somoion Excise department, niamko pe·chengaha maina ia chu dokkan sambaon skul dongako nikeba ia dokkanna licence-ko on·aha. Chinga ia chu dokkanrangko an·tangtangni man·gnirangna champengenga ong·ja indiba skulo poraienggipa chatro chatrirangna chanchiesa dakenga,” ine NGO-rang parakataha.
Indake ong·engon, ia chu dokkan aro bonded warehouse-ko salsnini gisepon chipatchina ba dingtang biapona apjitatskachina gita NGO-rang, District Administration-na somoiko on·angaha.