TURA: Re·anggipa Sombar walo, West Garo Hills a·jani Garobadha jolo, mongma matte mangsa, bijoli silitingo nangenba bijoli sala man·e siangna gita nangaha.
Wildlife department-ni District Forest Officer (DFO) Rupankar Marak-ni u·iatani gitade, ia mongma matteara batanggimin antirango Wakagre aro Doldegre jolrango re·rurae dongenggipa dolsa mongmarangni bakan ong·achim aro ua somoio ia mongma matte, Garobadha-oni Selsella-ona dakanggipa ramachipak re·brangangahachim.
Ia mongma matte, Garobadha-oni Selsella-ona dakanggipa ramani song damsako re·angengmitingo one kadingdegipa bijoli silitingo nangaha aro uandaken ua bijoli salako man·e siangna gita nangaha.
Ia mongmani siani a·selko talbate ma·sina ia mongmako post mortem ka·enga ineba DFO u·iataha.
Matburingrangnasan ong·aigija manderangnaba kenchakna nanganirang ong·engani gimin ia jolrango donggipa 11 KV line-rangko ta·raken am·sandienba taridapchina gita ua Ampati aro Tura-o donggipa MePDCL-ni official-rangna u·iataha ineba Marak parakataha.
