TURA: Meghalaya a·doko Jal Jeevan Mission (JJM)-ni kamrang chu·sokgipa ong·enga ine NPP-chi dilenggipa MDA sorkarini a·kangatani ja·man Chokpot jolni manderangde da·onan JJM-ni chiko tottaksaba ringe nikmanpakuja ine Garo Students Union (GSU) Chokpot regional unit matnangatskaaha.
India a·songni songadam nokadamrango aro jillarangoba ringani chirangna neng·nikaniko man·engani gimin a·songni Prime Minister Narendra Modi, 2019 bilsini August 15 tariko Jal Jeevan Mission-ko ra·gate on·ahachim ine janapatengon, Meghalaya a·doknaba Rs 786 crore tanngkarangko chamate songanti nokantionan chirangko sale on·china gita gong kror 786 tangkarangko tikatahachim indiba bilsidok ong·pilonaba kamrangko chu·sokate on·kujaenga ine GSU Chokpot unit-ni general secretary Spensar R Sangma matnangataha.
“Ma·mong sorkarini Meghalaya a·dokna chamatgipa JJM scheme da·onaba Garo Hills-ni bang·a biaprangon bimang ong·kujaenga uanoni Chokpot jolba damsa ong·paenga. Chokpot jolo songdongenggipa manderang PHE-ni chiko man·gijan bilsi 20-mang ong·pilengaha aro da·o Jal Jeevan Mission-ni chiko tottaksaba ringe nikujaenga,” ine Sangma parakataha.
GSU Chokpot unit-ni parakatani gitade, Chokpot jolrango Jal Jeevan Mission-ni kamrang maidake ja·manchakenga ine sing·sandina Chokpot-ni nangrimgimin dolrang Chokpot PHE-ni SDO-ko grongna changgni re·angachim indiba SDO-ni chokki bangbang ong·akosa nikeaiachim.
“PHE department-o kam ka·enggipa manderango sing·sandianiko dakon office-ona re·bagijan ru·utengaha aro songtang noktango dongesa kamrangkon ka·ataienga ine aganchakataha aro maini gimin re·bajaenga ine sing·on PHE-o chi dongjani gimin re·bakujaengana inesan aganchakna man·aiaha,” ine GSU Chokpot regional unit-ni general secretary parakataha.
“Chokpot Civil Sub-division-ni ning·o saksa PHE-ni SDO ong·e iandake dakaniara kraani ong·ja, ian area-ni manderangna aro PHE department-o kamko ka·enggipa manderangna neng·nikaniko ra·baanisan ong·aia. Iandakgipa officer-rangko chinga Chokpot area-ni manderang ra·chakna man·chongmotjawa. Mikkangchiba indakgipa kamrangko dakangkuode chinga Chokpot-ni nangrimgimin NGO-rang nie dongjawa aro uamangni kosako raken ja·ku deangkugen,” ine GSU Chokpot unit mikrakataniko on·ataha.
Indake ong·engon, Chokpot jolrango ringani chirangna neng·nikanirangko man·enga ine GSU Chokpot regional unit-ni general secretary parakatenba, ia jolrango songdongenggipa manderangni neng·nikanirangko ta·raken niatchina gita a·dokni PHE Minister Marcuise N Marak-ko didiataha.