TURA: North Garo Hills aro East Garo Hills a·jani ramarang gita niam gri koela salani bidingo inquiry dakani report-ko jinmana parakchina gita didie A·chik Youth Council (AYC), North Garo Hills a·jani Deputy Commissioner-na sedoataha.
AYC-ni parakatani gitade, Mangsang-Adokgre aro Songsak-Adokgre ramarang gita niam gri koelarangko salruraenga ine koborrangko man·soani ja·man ia bilsi January 5 tariko, North Garo Hills a·jani gitcham Deputy Commissioner, Additional Deputy Commissioner Tennystar R Marak-ni dilanichi inquiry dakchina gita ge·etaniko on·angahachim.
Inquiry-ko dakna gita ge·etaniko on·anio somoikode dongija, report-ko ta·rake on·china gitasan gitcham DC, North Garo Hills a·jani ADC-na ge·etaniko on·ahachim.
Indake ong·engon, ian Garo Hills-ni manderangna namen nangchongmotgipa ong·ani gimin ia inquiry-ni report-ko jinmana parakna nangchongmota ine AYC dabiangaha.
“Iandakgipa kamrangni bidingo maming dongnuani dongna nangja aro manderang iarangni bidingo kakketko ma·sie ra·na nangchongmota,” ine AYC parakataha.
Niam gri koelarangko salaniara samtangtango ong·telaigiparangna nangchakeanikosan ra·baaigija niamko pe·aniba ong·a ine janapatskaengon, ia inquiry report-ko jinmana parakanichi a·doko niam gri dakanirangko champengna gita ja·ku de·anirangko sorkari jinmana mesokna man·gen ine AYC parakataha.
