SHILLONG: South Garo Hills a·jani Balpakram National Park ning·o donggipa hectare 2.548 a·arangko sorkari, Maheshkola-oni Kanai-ona rama taridapanio jakkalna miksongenga.
Iani bidingo u·iataniko on·angengon, Wildlife (Protection) Act 1972-ni Section 35-ni sub-section (6)-ni ning·o on·gimin bilrangko jakkale aro National Board for Wildlife-ni Standing Committee baksa agangrikchengenba Maheshkola-oni Kanai-ona State Highway-04-ko 2-lane dake taridapna Balpakram National Park-ni ning·o donggipa hectare 2.548 a·arangko on·na gita Meghalaya sorkari, a·dokni Chief Wildlife Warden-na bilko on·ataha ine Forest & Environment Department-ni Commissioner & Secretary Pravin Bakshi parakataha.
A·arangko on·anio, National Board of Wildlife-ni Standing Committee-ni dongimin niamrangko ja·rikanggen aro ia committee-ni dongimin niamara, ian matburingrangni re·ruragipa biapsa ong·ani gimin matburingrangni re·ruraanirango maming champengani dongna nangjawa aro matburing re·pakgipa biaprango signboard-rangko donna nanggen ineba Bakshi parakataha.
Bakshi-ni parakatani gitade, ia biapo ramako tariengon, garirangni ta·rakaniko komiatchina aro rumble strip-rangko donna nanggen aro rama tarienggipa company, ia biapni a·arangko den·engmiting somoio a·arangko Kanai chiringo galna man·jawa ineba Standing committee niamko donaha.
Ia biapo kam ka·giparang, Balpakram National Park ning·o a·tiprangko songna man·jawa aro kamrangkoba BNP a·palonisa ka·na nanggen ineba dongimin niamrango parakataha.
Balpakram-ko 1986 bilsini January 31 tariko, Meghalaya a·dokni gitcham Governor, National Park ine parakatchengahachim aro ia National Park-ko 1987 bilsini December 27 tariko, a·songni gitcham Prime Minister Rajiv Gandhi sagi, nokdonggae on·angahachim.
