SHILLONG: Shillong songjinmani Lum Survey-o songdongenggipa manderangni nokrangko niam gri pe·galenba a·rikgalahani gimin a·dokni police-rang, Hynniewtrep Youth Council (HYC)-ko dilenggipa manderangni kosako mokordomako segataha.
East Khasi Hills a·jani Superintendent of Police (SP) Rituraj Ravi-ni parakatani gitade, HYC-ni president Roy Kupar Synrem, vice president Donbok Kharlyngdoh, assistant general secretary Isaac Basaiawmoit aro gipin dilgiparangni kosako police-rang, Sadar Police Station-o mokordomako segataha.
“HYC-ni membor-rang niamko jaktango ra·e, Lum Survey-o songdongenggipa manderangko niam gri a·rikgalaha. Lum Survey-o donggipa biapara Defence Estate-ni a·a ong·a indiba ia biapo niam gri songdongenggipa manderangko bichal ka·na gita kachari dongachim,” ine East Khasi Hills a·jani SP aganaha.
Shillong songjinmani Lum Survey-o niam gri songdongenggipa manderangko a·rikgalchina gita East Khasi Hills a·jani District Administration-na antigni somoiko on·ahaoba maming ja·kurangko de·jaha ine Bristibar salo, Hynniewtrep Youth Council (HYC)-ni membor-rang, ia biapo niam gri rikgipa nokrangko pe·e galenba, niam gri songdongenggipa manderangko a·rikgalatahachim.
HYC-ni president Roy Kupar Synrem-ni kobor ra·timgipa manderangna parakatani gitade, ia a·ara Guwahati-o donggipa Defence Estate Office-ni a·arangsa ong·achim aro ia biapo niam gri songdongenggipa manderangko a·rikgalchina gita uamang East Khasi Hills District Administration-na antigni somoiko on·ahachim.
“District Administration-na antigni somoi on·ani bon·ahani gimin chinga da·alo an·tangtangan ia biapo niam gri songdongenggipa manderangko a·rikgalatna re·baaha. Chingni on·gipa antignini gisepo ia biapo niam gri songdongenggipa manderangko a·rikgalani bidingo Deputy Commissioner-ni u·iatanina chinga sengahachim indiba da·alona kingkingan ua chingna mamingkoba u·iatpila dongjaha. Ia biapo niam gri drugs ba pekatgipa samrangko badingenggipa manderangba ia biapona re·bapilaha ine chinga koborrangko man·soahani gimin chinga ta·raken ia biapo niam gri songdongenggipa manderangko a·rikgalatna nangnikaha,” ine Synrem aganahachim.
“Nokrangko pe·e galna gita JCB bolsako ra·baahachim indiba ia biapo niam gri songdongenggipa manderangko a·rikgalanio maming neng·nikanirangko man·jahani gimin chinga JCB-ko jakkalna gita nangjaha. Indake ong·genchimoba, ia manderang ia biaponan re·bapilgenchimode ba sorkari uamangna ia biapo dongna permission-ko on·genchimode chinga da·o changgipinode JCB bolbri bolbongako ra·bae, ia biapo songdongenggipa pilakkon a·rikgalatgen,” ineba Synrem parakatahachim.
Uni iandakgipa kattarangna aganchakaniko on·angskaengon, “Niamni kosako darangba re·na bil dongja maina NGO-rang darangba iandake a·rikgalna gita sorkarina somoiko on·na man·ja,” ine Ravi parakatskaaha.
