AMPATI: Sombar salo, South West Garo Hills a·jani District School Education Office-ni gita District Level Science, Mathematics aro Environment Exhibition-ko Ampati-o donggipa Springfield Higher Secondary School-o ong·atangaha aro ia exhibition-o South West Garo Hills a·ja gimikoni dam 10 skulrang bak ra·angaha.
Ia exhibition-ko ong·atanio, Ampati Government Higher Secondary School-ni gitcham Vice Principal KR Marak, mongsonggipa sokgipa ong·e bak ra·angaha aro tom·anio ua jinmana aganprakangengon, ia gital chasongo Mathematics aro Science gita dakgipa subject-rangko nangchongmotani gimin iandakgipa subject-rangna kenjachina chatro chatrirangko didiangaha.
Ia District Level Science, Mathematics aro Environment Exhibition-o skanggipa boksisko Ampati-ni St Claret Higher Secondary School, gnigipa boksisko Hari Shanti Niketan Vidyalaya Secondary School aro gittamgipa boksisko Good Shepherd Secondary School cheangaha.
Ia district level exhibition-o chegipa ong·ahani gimin State Level Science, Mathematics aro Environment Exhibition-o St Claret HS School, South West Garo Hills a·jani pal bak ra·eskana chol man·gnok.
Ia Exhibition-o dongpae bak ra·anggipa gipin manderangara, SWGH a·jani DSEO I/c T Ch Marak, Springfield HS School-ni Principal AA Sangma, Betasing Block-ni Block Mission Coordinator SN Sangma aro gipinrang ong·a.
