AMPATI: South West Garo Hills a·jaoba ‘Remal’ balminduri balanganichi, bang·a biaprangon nok-jamrang, bagan-barirang aro manderangni ma·manti gam-jinrang nosto ka·ako man·na nangahani gimin Mongolbar salo, South West Garo Hills a·jani Deputy Commissioner Hema Nayak, nosto ka·a man·gipa biaprangko niangaha.
South West Garo Hills a·jani bang·bata biaprangon balminduri balanichi nok-jamrang nosto ka·ako man·angan baksana bol wa·arang aro bijoli krongrangba be·na gita nangtokahachim.
Indake ong·engon, Mongolbar salo, South West Garo Hills a·jani Deputy Commissioner, Zikzak Block-ni Block Development Officer Diganto Hajong aro gipin official-rang, Zikzak, Nogorpara, Mahendraganj, Salmanpara aro uandakgipa biaprangona re·ange, nosto ka·a man·gipa biaprangko niangaha aro duko ga·akenggipa nokdangrangna dakchakanirangko on·skana gita hisap ka·anirangkoba dakangjolaha.
Garo Hills-onaba Sombar walo, ‘Remal’ balminduri sokbae, bang·a biaprangon nok-jamrangni nosto ong·anirangko, bol wa·arangni pangpikanirangko aro a·arangni ruronganirangko nikna gita man·angahachim.
