TURA: Sombar walo, Garo Hills-oba ‘Remal’ balminduri balangani a·sel Garo Hills-ni bang·bata biaprangon bolrang be·dape bijolirang nosto ong·atako man·tokaha.
Iani bidingo talataniko on·angengon, Garo Hills-ni bang·bata biaprangon 33 KV aro 11 KV-ni transmission line-rang nosto ong·atako man·e bijolirangko man·tokjaha aro bijoliko taripilna gita komibeoba sak 80 manderangko department ra·dapaha ine Mongolbar salo, a·dokni Power Minister AT Mondal parakataha.
Power Minister-ni parakatani gitade, Power department-ni manderang rakbee kamrangko ka·ahani a·sel bang·bata biaprangon bijoliko on·pilna man·aha aro je biaprangon bijoliko on·piltaina man·kujaengachim, uandakgipa biaprangoba bijoliko on·pilna gita rakbee kamrangko ka·tokenga.
Bijoli line-rangko maini gimin da·ona kingkingan a·ning gita ra·kujaenga ine sing·on, da·o dipet Meghalaya a·doko ia kamko chu·sokatna man·kujaenga maina bijoli line-rangko a·ning gita salanio bang·en korosrangko nanggen aro gipin neng·nikanirangba dongkuenga ine Power Minister talataniko on·angaha.
Indake ong·engon, Sombar walo balminduri balanganichi Garo Hills-ni bang·a biaprangon bolrang be·e ramarang champengatako man·aha aro bijoli line-rangba nosto ka·ako man·tokaha indiba Mongolbar pringonin State Disaster Response Force (SDRF)-ni manderang, ramarangko watpilna gita bang·a biaprangon bolrangko den·e galeaha.
Tura-ni Gandrak Dare joloba bol pangsa bijoli line-rangko be·dapahani a·sel manderang re·a doaniosan ong·aigija bijoliko man·anioba neng·nikanirangko chagrongna nangaha indiba SDRF-ni manderang ta·raken ua biapona re·ang bolrangko rongtalateaha.
Apsan daken Forest department-ni manderangba, dingtang dingtang biaprango bol be·anirangko rongtalatna gita dakchaktokaha.
Williamnagar-o Civil Defence & Home Guards-ni sipairangba, Kusimkol jolo dal·begipa bol pangsani be·ako rongtalateaha.
