RESUBELPARA/BAGHMARA: Bristibar salo, North Garo Hills a·jani chatro chatrirangna District Level Science, Mathematics aro Environment Exhibition-ko Resubelpara-ni Dekachang Community Hall-o ong·atangaha aro ia exhibition-o North Garo Hills a·ja gimikni damdok skulrang bak ra·angaha.
Ia Exhibition-ko ‘Science & Technology for Society’ ine pangchakaniko donenba ong·ataha aro ia exhibition-o Mendipathar-ni St Thomas Higher Secondary School chegipa ong·e, state level exhibition-o North Garo Hills a·jani pal bak ra·na gita seokako man·aha.
Ia exhibition-ko ong·atanio, North Garo Hills a·jani Additional Deputy Commissioner (ADC) Tennystar Marak, mongsonggipa sokgipa ong·e chatro chatrirangna aganprakangengon, Science aro Mathematics subject-rango gisik nangchina aro dingtang dingtang neng·nikanirangko Science aro Maths-ni application-rangchi namatna jotton ka·china ku·pattianiko on·angaha.
Ia program-ko ong·atanio, ia bilsini SSLC porikkao Top 20-ni brigipa biapko man·e chu·sokanggipa St Thomas Higher Secondary School-ni chatri Wanma Sangma-naba dingtangmancha mande ra·pilskaaniko dakangaha. Ia tom·anio ua an·tangni chatro chatriskarangna kan·dike agan-ku·pattianirangko on·angengon, chu·sokgipa ong·na skani dongchina aro chu·sokgipa ong·na gita tikkelchina didiangaha.
Ia District Level Science, Mathematics aro Environment Exhibition-ko ong·atanio dongpae bak ra·anggipa gipin manderangara, St Thomas Higher Secondary School-ni Principal Sister Lalita Lakra, Resubelpara-ni DSEO Samar Dey aro SDSEO WG Momin ong·a.
Apsan daken South Garo Hills a·jaoba District Level Science, Mathematics aro Environment Exhibition-ko Baghmara-ni Don Bosco Higher Secondary School-o ong·atangaha aro ia exhibition-o dingtang dingtang skulni chatro chatrirang bak ra·angtokaha.
Ia exhibition-o Don Bosco Higher Secondary School-ni Iaishahbiangpor Jyrwa skanggipa boksisko man·e da·o State Level Exhibition-o bak ra·na gita seokako man·aha. Gnigipa boksisko Mount Vale Secondary School-ni Chandini G Momin aro gittamgipa boksisko United Baptist Secondary School-ni Shiny Merikchi Marak cheangskaaha.
