TURA: Garo Hills-ni chatro chatrirangna technology aro vocational training-ko on·na man·na gita Garo Hills-oba Central Institute of Technology (CIT)-ko kulichina A·chik Conscious Holistically Integrated Krima (ACHIK), a·dokni Education Minister Rakkam A Sangma-ko didiataha.
“Meghalaya a·dokko man·chengaoni bilsi 50 batpilengahaoba da·alonan Garo Hills-o mingnamgipa institute-rangkode kulia dongkuja. Dingtang dingtang mingnamgipa institute-rang jekai NEHU, NIT, NIFT, EFLU aro uandakgipa institute-rang pilakkon Shillong-osa kuliaha indiba Tura-ode da·alona kingkingan iandakgipa institute-rangko kulikuja. Tura-o dongpagipa NEHU campus-ba chu·gimik bilrang dongja aro bang·gija department-rangsan dongaia. Garo Hills-o mingnamgipa institute-rang dongjani a·selan cholgri ong·pagipa chatro chatrirangde dingtang dingtang course-rangko ra·pana chol ong·jaenga aro man·e cha·kalgipa chatro chatrirangsan Shillong aro gipin biaprangona re·ange poraipana chol ong·enga,” ine Education Minister-na sedoatgipa chittio ACHIK parakataha.
ACHIK-ni parakatani gitade, Garo Hills-o CIT-ko kuligenchimode Garo Hills-ni chatro chatrirangkoba Computer Science Engineering, Petroleum Engineering, Chemical Engineering, Cyber Security Engineering, Instrumentation Engineering, Mining Engineering, Aerospace Engineering aro Aeronautical Engineering gita dakgipa course-rangna tarisamsona man·genchim.
“Polytechnic aro ITI gita dakgipa institute-rangode gitcham engineering course-rangsan dongaiani gimin chatro chatrirang gital course-rangko man·jaenga, uni gimin chingni dabianiko knachakenba Garo Hills-ni chadamberangna CIT-ko kulina gita ja·kurangko de·chakatchina chinga mol·molenga,” ine ACHIK-ni dilgiparang parakataha.
