SHILLONG: Shillong-Dawki road project-ni gita Rilbong rama bibrao flyover-ko rikani kamko jako ra·gipa contractor-na geo technical survey ka·angna gita ra·chakaniko on·aha.
Uandake ia flyover-ko rikmanchaa ong·ode ian Shillong songjimani skanggipa flyover ong·gen. Flyover-ko Jhalupara-ni Mahavir Park-ona rikgen aro Anjalee Petrol Pump-na sepang sepango bon·gen ba matchotatgen.
NHIDCL-ni official-ni parakani gita, flyover-ko rikna kamko jako ra·gipa contractor, flyover-ko Barik point-ona rikna a·dok sorkarini ra·chakataniko man·na ka·dongachim.
Indake ong·egnon contractor-ko kamrangoko a·ba-chengna skangba project-na soil test ba a·ako porikka ra·an baksan gipin porik-kako ra·chengna ge·etaha.
Da·odipetde a·dok sorkari, Anjalee petrol pump-onasan a·aok man·kuenga jekon NHIDCL-na pakwataha.
Kobor man·ani gitade project-ko matchotatna bilsi gni somoiko on·aha, uni gimin ia project-ko bilsi gnini gisepon matchotatna nanggen indiba da·odipet-de NHIDCL headquater-oniko maming koborko man·kujaenga.
Uandake flyover-ara Anjalee petrol pump-ona sokejawa indiba maini gimin petrol pump-ko pe·galahani gimin sing·on official indine agancha-kaha, “flyover-ko rikanio Anjalee petrol pump-o gari re·giparangna namen neng·nikani ong·gen uni gimin pe·galna nangaha.
Flyover-ko Shillong Dawki road project-ni skanggipa phase ba gadango kam ka·anggen.
