SHILLONG: Ia chang Lok Sabha election-o National People’s Party (NPP)-ni Meghalaya a·doko amako man·anina NPP-ni dilgiparang, Bharatiya Janata Party (BJP)-ko matnangna man·jawa aro apsan daken BJP-ba NPP-ko matnangna man·jawa ine BJP-ni national vice president M Chuba Ao parakataha.
“Ian manderangni namnike seokanisan ong·aia aro iani gimin dolgnini gisepo matnanggrikna man·jawa,” ine ua aganaha.
Election-o saksade chegen aro saksade amako man·telaigen ine janapatengon, iani bidingo political dolgni matnanggrikna nanga katta ong·ja ine Ao parakataha.
“Dolgnini gisepo matnanggrika ina kattade manderangni chanchianisan ong·aia maina mitam manderangde chona kattakoba dal·atna jotton ka·rongaia,” ine ua aganaha.
Ia chang Lok Sabha election-o NPP, BJP-ni chakpaanichi susaenba Tura aro Shillong Lok Sabha seat damgnion amchepako man·ahachim.
BJP baksa bakrimahani giminsa Garo Hills-ni manderang ia changode NPP-na pu·ongija, Congress dolna pu·onskaaha ineba mitam manderang aganskaahachim.
Ia Lok Sabha election-o NPP aro BJP dolrang, bang·bata constituency-rangon dolsa dolgipinna chakgrike susaangahachim.
Indake ong·genchimoba, Garo Hills-o Prime Minister Narendra Modi-ni bimingo pu·onchina gita Chief Minister Conrad K Sangma-ni campaign ka·aniara batesa NPP-na gimaaniko ra·baani gita ong·skaaha.
