SHILLONG: Adita salrangna skang matchotanggipa Lok Sabha election-o amako man·ahaoba mikkangchi bilakbate chadengchina aro dakgrikaniko watgaljachina National People’s Party (NPP)-ni adviser DD Lapang, NPP-ni membor-rangko didiangaha.
Lok Sabha election-o amako man·ahani gimin aro mikkangchi ong·atna sienggipa District Council election baksana Gambegre by-election-na tarisamsoani bidingo chanchirimna gita Sonibar salo, NPP-ni tom·aniko Chief Minister Conrad K Sangma-ni noko ong·atanio Lapang, NPP-ni membor-rangna agan-ku·pattianirangko on·angaha.
“Result-rang jeba ong·china an·ching an·chingni dakgrikaniko watgalna nangja maina mandeo dakgrikna skanian dongjahaode mandeba siaiaha,” ine Lapang aganaha.
Ia tom·anio NPP-ni gitcham state president aro Rajya Sabha-ni MP Dr WR Kharlukhi baksana NPP-ni dingtang dingtang dilgiparangba bak ra·angtokaha.
Ia tom·anio, Lok Sabha election-o maini a·sel amako man·ahachim aro maikai mikkang election-rangona tarisamsogen, uarangni bidingo NPP-ni dilgiparang jinma chanchirimangaha.
KHADC aro JHADC-ni election baksana Gambegre by-election-koba ong·atna siengani gimin ia tom·anio, NPP-ni dilgiparang, ia election damgnini giminba chanchirimangaha.
Gambegre by-election-o susana gita candidate-ko seokani bidingo chanchirimangjahaoba maikai ia constituency-ko chena man·gen, uarangni bidingo NPP-ni dilgiparang chanchirimangaha.
Gambegre constituency-ni by-election-ko da·o jadokni gisepon ong·atna siengani gimin pilak political dolrangan da·o ia by-election-na tarisamsotokskaengahachim.
Lok Sabha election-o NPP, Shillong aro Tura Lok Sabha seat damgnion amako man·ahani gimin party-ko bilakatpiltaina gita Gambegre seat-ko chena miksongskaengachim.
Koborko man·soani gitade, Gambegre constituency-ni by-election-o susana gita Garo Hills-ni NPP worker-rang, a·dokni gitcham cabinet minister James PK Sangma aro Chief Minister Conrad K Sangma-ni jikgipa Mehtab Chandee baksana gipin dilgiparangni bimingko minge donsotokaha.
