SHILLONG: Meghalaya sorkarini ra·gatenggipa gital Power Policy 2024-ni ning·o a·doktangni bijoli badinggipa company-ko bikotna chol ong·gnok.
Power policy-o janapani gitade, Meghalaya a·doko bijolina nanganiko hydro power bikotanichisa on·na man·enga aro uandaken wachini somoiode a·doko nangana baten bijoliko man·enga indiba sin·karini somoiosa November-oni March jaona kingkingan bijoli chu·ongskajaenga.
Iandake bijoli chu·ongjani somoirango a·dokna dingtang biaprangonikoba bijoliko brena nangao ga·aka aro iako Meghalaya Power Distribution Corporation jako ra·skaengachim.
Iani giminsa short term-o bijoli ra·ani kamrangko ka·na gita dingtangmancha bimangko nangenga aro iakon State Owner Power Trading Company-ni bimango bak ong·atna sienga.
A·doko ia bijoli badinggipa company-ko bikotani miksonganiara, dingtang dingtang company-rang baksa bijoli breani kamrangko ka·na, Meghalaya Power Distribution Corporation Limited-ni pal short-term-o bijoli breani aro palani kamrangko jako ra·na aro uandakgipa mongsonggipa kamrangko ka·anian ong·enga.
Ia Power Policy-o janapani gitade, a·doko hydro power project-rangko namdapatna gita pilak nanga korosrangko Meghalaya sorkarian on·gen.
