TURA: North Garo Hills a·jani Bajengdoba jolo, bilsi sokkugijagipa me·chik bi·sa saksako an·o dongata ine matnangenba, Bajengdoba jolni dingtang dingtang NGO-rang, Joint Action Committee (JAC)-ni ning·o ia me·chik bi·sani ma·gipa baksa mande saksani kosako FIR ka·doangaha.
Bajengdoba JAC-ni president Dobilin A Sangma-ni parakatani gitade, me·chik bi·sarangko iandake kal·akanichi an·o dongataniara, mikkangchi me·chik bi·sani janggi tanganiko nosto ka·e galani gita ong·enga aro mikkangchi Bajengdoba jolrango iandakgipa obostarang ong·taijana gita uamang, me·chik bi·sani ma·gipa baksa dos dakgipa mandeni kosako June 17 tariko, Bajengdoba police station-o FIR ka·doangaha.
“Poraienggipa aro bilsi sokkugijagipa me·chik bi·sako an·o dongate uni janggi tanganiko rusigalahani gimin chinga Bajengdoba-ni dingtang dingtang NGO-rang, JAC-ni bimingo ia dos dakgipa mandeni kosako FIR ka·aha,” ine Bajengdoba JAC-ni president parakataha.
Mikkangchi me·chik bi·sarangko iandake kal·akjachina aro me·chik bi·sarangni dal·e chue poraianggniko nosto ka·e galjana gita manderangna mikrakataniko on·na ia mandeni kosako uamang FIR ka·aha ineba Sangma parakataha.
“Batanggimin sal somoirango Bajengdoba jolrango iandakgipa obostarangko nikna man·ahaoba adita bilsirangnade iandakgipa obostarangko nikna man·jahachim indiba da·o Bajengdoba iandake me·chik bi·sako an·o dongataniko niktaie chinga NGO-rang, mikkangchi iandakgipa obostarang ong·taijana gita ia ja·kuko de·aha,” ineba Bajengdoba JAC-ni president parakataha.
