TURA: North Garo Hills a·jani Adokgre songo Ildek chiringo gital rikgipa culvert-ko chi man·angahani a·sel songni nokni manderang, ia chiringko re·batanio neng·nikanirangko chagrongna nangtokengani gimin ia chiringo gital RCC dolongko rikskachina A·chik Holistic Awakening Movement (AHAM) Adokgre regional unit, a·dok sorkariko didiataha.
AHAM Adokgre regional unit-ni parakatani gitade, Ildek Akongo RCC dolongko rikna gita 2017 bilsion sorkari, gong 12,29,89,017 tangkarangko chamahachim indiba ja·mano ia dolong rikaniko sorkari den·galpilahachim. Iani bidingo AHAM-ni membor-rang, a·dok sorkarini dingtang dingtang official-rangko gronge agangrikahachim indiba uamangni mol·molanirangko sorkari knachakjaha.
“Ia songo RCC dolongni pal culvert-ko rike on·aniara maming orto gri ong·aiaha aro da·o ia culvert-ko chi pe·angani ja·man songni manderang, mongsongbate skul re·enggipa chatro chatrirang neng·nikanirangko chagrongna nangtokengaha,” ine AHAM Adokgre regional unit-ni dilgiparang parakataha.
Ia gital rikgipa culvert-ko maming kamna jakkalani gri adita salrangna skang mikka jime waangani somoio chi pe·angaha ine janapatengon, a·bachengo tik ka·gimin gitan Ildek A·kong RCC dolongko da·o rike on·skachina aro iana engineer-rangni nirokanio namgipa contractor-ko tik ka·e on·china gita AHAM Adokgre regional unit mol·molataha.
